Meni

MENI

"Gurçuk iýer" diýip süýji dänäni,
Ajy däne erge sapdylar meni.
Zaýalanar duzsuz goýsaň nämäni,
Diýip bir şormaňlaý etdiler meni.

"Güneşde, ojakda süýjeýär tagam,
Sen bolsa gögele, turşy hem-de ham"
Diýip, el-aýagmy baglaýyp ykjam,
Yşkyň gazanyna atdylar meni.

Ekin iri bolýar ýekelap çyksaň,
Üzüm kän miwelär pudasaň, çapsaň,
Kömelek dykyzdyr takyrdan tapsaň,
Diýip, gaty ýere ekdiler meni.

Aganyýaz ŞALLYÝEW