Çilimkeş

ÇILIMKEŞ

Toba kyl, el göter nähak işiñden,
Ýygyr nebsiñ, gartar raýyñ, çilimkeş.
Dogañ kabul bolmaz, arzyñ alynmaz,
Bil, geçilmez bu günähiñ, çilimkeş.

Imandan aýrylyp, dinden çykar sen,
Bipeýda murdary näge çeker sen,
Puluñ, janyñ köýüp, içiñ ýakar sen,
Ýanaşsañ, pis geler ysyñ, çilimkeş.

Şerim etmez sen, uýat gelmez ýüzüñe,
Barça zatdan ýeg görüner gözüñe,
Bu gün munda ryzk eder sen özüñe,
Tañla gara bolar roýuñ, çilimkeş.

Sogabyñ ýok bolar, haýryñ bikärdir,
Halyñ müşgil bolar, işiñ duşwardyr,
Ol Muhammet resul senden bizardyr,
Gazap eder bir Hudaýyñ, çilimkeş.

Gitmez gara tütün, basar görüñi,
Huryş atly ýylan ýuwdar seriñi,
Dört ýanyñdan daradarlar ýeriñi,
Teñ bolar mekanyñ, jaýyñ, çilimkeş.

Bedeniñi köýdürerler köz bile,
Bu güwäden gutulmaz sen arz bile,
Muwekkeller urar otly gürz bile,
Kim ýetişer haraýyña, çilimkeş.

Zelili diýr, işiñ ahu-pygandyr,
Jigeriñ hun bolar, çeşmiñ girýandyr;
Agzalaryñ öz janyña duşmandyr,
Güwälik biýr destiñ, paýyñ, çilimkeş.

Gurbandurdy ZELILI.