Daglar

DAGLAR

Her gün irden örüp, öýden çykamda,
Salam berip, garap-bakanym daglar.
Durdyhan daşda däl, gözüm çakynda,
Köňül küýsäp, zaryn çekenim daglar.

Bama baryp, Ymarata ýol salsam,
Teşnä tenekardyr Alguwan gelsem,
Aýdereden ötüp böwür dolansam,
Peder munda ýatyr kökenim daglar.

Injirli jar – Ynjar – sen dogduk depäm,
Nurýagdy dost, Öwez gardaş, bir şepäm,
Üç tirkeş biz, bile gezen günlem kän,
Daşdan-daşa basyp, bökenim daglar.

Gözel Sumbar kenarynda ýaýnanym,
Miweleri ezip-içip baýnanym,
Mal bakamda, daş togalap oýnanym,
Gorduryp gaýaňy ýykanym daglar.

Keman atyp, serçeleri uçuryp,
Käte birin uçarynda gaçyryp,
Çagalygym akylymdan geçirip,
Hoştap howaň jana ýakanym daglar.

Durdyhan, Döwlethan, Garaseýitjan,
At galdyryp giden bolsa her ynsan,
Gaýrata mynasyp berler şöhrat-şan,
Ägirtlere mertlik kakanym daglar.

Çalguçan, Çuňdere, Toraňňy, Miwet,
Akbulak, Temençä baraňda syn et!
Gurygoldan çyksaň yzyňa äňet,
Jeňňelli deräňi sökenim daglar.

Apbasyň ýatagy, Üçnar bar, bärde,
Hol, Gyraky dere görüner törde,
Ortaky derä bar, aw etseň garda,
Gaýaň gatda, awum bukanam daglar.

Çeşmeli deräňe mal kowup yrman,
Ylgawym ýazdyrman, gaýdardym durman,
Gaýaňda seleňlän arçaňa gurban,
Başyna dumanyň çökenim daglar.

Jülgäňde doguldym, ösdüm, boý alyp,
Küýseýän kemerleň ýadyma salyp,
Zawly bolup ýörün, bu ýerde galyp,
Hyýalda seýliňe çykanym daglar.

Ýaz aýlary barsam, daglar üstüne,
Keýik-käkilikleň çykman kastyna,
Uçudyňa gelip, baksam astyna,
Belentsiň, Beýiklik dakanym daglar.

Illi diýr, gartaşan ýaşyma ýetdim,
Ýaş wagtym göçmegi bir niýet etdim,
Şindem diýip ýörün: «Gowy niýetdiň»,
Jülge syryp Sumbar akanym daglar.