Erteki

ERTEKI

Bir çolak gojany öñden tanaýan,
Şondan eşidipdim bu gürrüñi men.
Otlar patyşasy birçak-bireýýäm
Jeñ etmekçi bolýar adamlar bilen.

Adamdan elheder edýän däldir ot,
Muña garamazdan, tutup dessury.
Jansyzyny iberdi ol bada-bat,
Nirede suw köpräk, nire hem gury,

Hasaba almaly ilki ol jansyz
hem görmeli ýurdy öz gözi bile.
Soñra bir gün otlar serhetden geçip,
Öwürmeli ynsan ýurduny küle.

Mekir hem yzgytsyz ýañky jansyz ot
Öwrüldi zyýansyz, ýuwaşja zada.
Eldeki bolaýdy öñki sansyz ot,
Öýde ot saklamak öwrüldi kada.

Daş ojaklar boldy onuñ mesgeni,
Ol nahar bişirdi, gije nur saçdy.
Üşäni ýylatdy sowuk gyş güni
Demriñ hem ot bilen eñkamy gaçdy.

Çyralarda ýandy, ybadathana
girdi, tüsseletdi ajy çilimi.
Hemdem bolup aw awlaýan ynsana,
It kimin ýalady ynsan elini.

Ol hyzmatkär boldy hem işçi boldy,
Tiz bardy ynsanyñ islän ýerine.
Şem bolup, tabyda şöhle hem saldy,
Dost boldy ynsanyñ perzentlerine.

Ot eldeki bolan bolýardy ilki,
Soñra tüýs ýürekden boldy eldeki.
Ot bilen ýaşady adam köp ýyllap,
Ot hemişe geldi adamy goldap.

Öñki niýetleri ýitdi, gizlendi,
Ot ynsana boldy hakyky ýaran.
Ýaşaýar öýlerde mawy gözlerde,
Ot bu gün lowurdap nur saçýar her ýan.

Pawel BOSU,
moldowan şahyry.

Rus dilinden terjime eden: Allaberdi HAÝYDOW.