Geçmiş

GEÇMIŞ

Geçmiş näme?
Atalaryň mazary.
Geçmiş näme?
Ol uruşda ok degen
Kakamyň çep aýagynyň azary.

Geçmiş — bu ejemiň süýtdeş dogany,
Geçmiş — agyrysy okly synalaň.
Ojakdan göterlen çal tüssä meňzäp,
Ýaýla siňen hasratlary eneleň.

Geçmiş — bu daýymyň ýazan hatlary…
Hem ejemiň gözläp ýörşi mazaryn.
Geçmiş — bu kakamyň barmaklarynyň
Mekan edinmegi deňziň kenaryn.

Geçmiş — bu daýymdyr kakam ýalylaň
Baýdak kimin lowlap galan namysy.
Gözýaş bolup gözden syrygan ýyllar,
Kiçijik kagyzyň äkelen ýasy.

Bu zatlary duýup durkaň özüňem,
Menden: “Geçmiş näme?” diýip soraýaň.
A men bolsa, nämüçindir, kakamyň
Barmagy ýok ellerine garaýan.

Gözel ZARYPOWA.