Göwün

GÖWÜN

Kakasyndan taýak iýen çaga deý,
Göwnüm bir zatlara hamsykdy şugün.
(Ýere sokduň, mydam pylçadyň, ýördüň-
diýe aglamjyrap dillendi göwün).

Özge göwne bolsa-bolsun etdim men,
Hemmesi-de geçdi-gitdi gelşine.
Göwnüm batgalyga çümdi-le welin,
Çykarmadym Gimalaýyň gerşine.

Käteler edilen zerur ýagşylyk,
Ýaşamady kebelegiň ömriçe.
"Haýyr bolsun" diýe, oturdym,
dymdym.
Kabul etdim Ýaradanyň emriçe.

Aý, garaz, mertlige meňzetdim, ýördüm,
Göwün yzasyndan ejir çekeni.
Diňe göwnüň bilen iş salşyp ýörseň,
Adam öz-özüni iýjek ekeni...

Ylham GURBANALYÝEW.