On sekiz ýaş

ON SEKIZ ÝAŞ

On sekiz ýaş. Kämillik ýaş. Eziz ýaş,
Öz gyzygyñ bilen hoş etdiñ göwnüm.
Sende ýasan duýgularym bu durmuş,
Gaýtalanmaz indi, etse-de öwrüm.

Sensiñ ýaş ömrümiñ iñ gözel çagy,
Öwretdiñ çägini ak hem garanyñ.
Öwretdiñ söýmegi düýmegiñ bilen,
Hem-de tanamagy dosty-ýaranyñ.

Çyndan aglamagy, çyndan gülmegi,
Hem gadyr goýmagy degerli kişä.
Göwnün ýykmazlygy hiç bir ynsanyñ,
Öwretdiñ söýgiñi bermegi kiçä.

On sekizim, elýetmezim, gymmatym,
Düýne döndi senli günler durşuna.
Garagol çagalyk alysda galdy,
Gadam basdum has uly bir durmuşa.

▶ OÝLANMA

Senli günler göz öñümde janlanyp,
Kuwwat gelen ýaly bolýar bu jana.
Aý şöhlesi düşüp dar penjireden,
Juwan ýüregimi salýar heýjana.

Asmanda ýylgyryp seniñ ýüz-keşbiñ,
Ýyldyzlara sary şeýle çagyrýar.
Seniñ syrdam boýuñ bilen deñleşip,
Ak arzuwda, ak asmanda men barýan.

Ine-de, ýañlandy söýgi mukamy,
Meniñ elim elleriñde eglendi.
Iki ýaş ýüregiñ birigen güni,
Gözellikden asman-zemin çaglandy.

Oýlanmalar alyp meniñ serimi,
Erkim gidýär arzuwlaryñ alyna.
Arman, ýene sensizligiñ yzasy,
Dolaýar bu hakykatyñ ýoluna.

▶ EJE

Eje, men ýene-de seni küýseýän,
Seniñ sözleriñe suwsady ýürek.
Bagtly günüm hem ejizlän wagtlarym,
Özgeler däl, maña diñe sen gerek.

Eje, men ýene-de seni küýseýän,
Baharyñ mylaýym ýeline derek,
Meñ näzik kalbyma päk hüwdiñ bilen,
Seniñ mährem sesiñ, señ söýgiñ gerek.

Eje, men ýene-de seni küýseýän,
Diñe sen ugrumda bolýañ janserek.
Eziz janym señ ýoluña sadaga,
Dünýäde mähriban ejeler gerek.

Ogulkeýik SAPARMYRADOWA.