Watan

WATAN

Güýç alanym, mährim siňip yşkyňa,
Ähli beýikligiň seresisiň sen.
Gözlem röwşen tapar ajap keşbiňe,
Seniň birje gysym mele topragňy
Dünýäniň malyna çalyşmaryn men.

Seni zerler bilen bezärdim,
ýöne
Seň ýanyňda zerler dagy nämedir?!
Maňa ylham berýän ummanymsyň sen,
Göwnüm seniň gujagyňdan gitmejek
Şol ummanda erkin ýüzýän gämidir.

Kalpdan çykýar seň şanyňa sözlerim,
Ýeller owaz bolup girýär kalbyma.
Gül sähraňdan nura dolýar gözlerim,
Mähriň ýüregimde gaýnasyn Watan,
Ýagşy zatlar ýaran bolsun alnyma.

Mähirli goýnuňda ösdüm,
                                                örňedim,
Zybanyma asal bolup ornadyň,
Durmuşyma bagt nuruny gatanym.
Beýikligiň adyň bilen ölçesem
Sen elýetmez, mukaddessiň Watanym!

■ AŞGABAT

Keşbiň säherleriň aklygy ýaly,
Göýä erteki deý tämiz, hyýaly,
Bägüller büremiş jähekläp ýoly,
Ol jenneti ýada salýaň, Aşgabat!
Täze ýyly garşy alýaň, Aşgabat!

Güller açýan baharymsyň, baharym,
Güllärsiň sen waspyň edýän mahalym,
Lowurdaýan ak mermerden şäherim,
Ol jenneti ýada salýaň, Aşgabat!
Täze ýyly garşy alýaň, Aşgabat!

Dünýäň nazarynda bedew deý badyň,
Kalplara ylhamdyr zerewşan adyň,
Sen guwanjy bolduň ýakynyň-ýadyň,
Ol jenneti ýada salýaň, Aşgabat!
Täze ýyly garşy alýaň, Aşgabat!

Ajap seýilgähler sende ýerleşýär,
Guşlar saýrap, öz dilinde gürleşýär,
Bagta uzan ýollar sende birleşýär,
Ol jenneti ýada salýaň, Aşgabat!
Täze ýyly garşy alýaň, Aşgabat!

Sadap MUHAMOWA.