Adyñyz kim? / intermediýa

ADYÑYZ KIM?

Ýazyjy Çary Aşyrowyñ 80 ýyllygyna

- Adyñyz?
- Çary.
- Atañyzyñ ady?
- Aşyr.
- Çary... Aşyr. Çary Aşyr. Wiý, Siz ýazyjy Çary Aşyrowmy?
- Hut şonuñ özi.
- Onda salawmaleýkim, Çary aga.
- Waleýkim essalam...
- Neme-le, bi, näme üçin iş wagty adamlar bu ýerik, ýagny uniwersitetiñ öñüne ýygnanyşýakalar? Ýa miting-zat geçirjek bolýañyzmy?!
- Ýok, toý toýlamaga geldik.
- O nämäñ toýy? Plan dolduñyzmy?
- Ýok, plan ýañy 80 prosent boldy. Şony belleýäs.
- Bagyşlañ, hormatly ýazyjy, bu zamanlarda plan dolanyñ bilenem beýle üýşmeleñ edilmeýä. Siz-ä ýañy 80 prosent... Ýogsa-da haçan 100 prosent bolmakçy?
- 2010-njy ýylda.
- Näme-e?! Düşünmedim. "80" diýdiñiz. "100" diýdiñiz.
- Rahatlanyñ, bu ýygnanyşyk meniñ 80 ýaşymyñ toýy. Ýubileýim.
- O-ho-ow, hälden şeý diýiñ-dä. Toýuñyz mübärek bolsun! Wagtyndan öñ 100 prosent boluñ diýenim bilen Siziñ artdyryp ýazma ýol bermejegiñizi bilýän.
- Ynamyñyz üçin köp sag boluñ.
- Ýubileý dabarasynyñ öñ ýanynda Size käbir soraglar bilen ýüzlenmek mümkinmi?!
- Mümkin. Baş üstüne!
- Edebiýata goşgy bilen geldiñiz, soñam proza...
- Düşündim. Ol şeýle boldy. Uruşda meni ölümden gutaran Nina hakynda ýazan goşgymdan köpler habarlydyr.
- "Ermeni gyzymy"? Onu ýatdanam aýdyp biljek.
- Berekella. Ynha, bir gezek Ýerewana ýygnaga gidemde, galamdaşlarymyñ tagallasy bilen, öz halasgärimi tapdym duruberdim. Özem näçe ýyldan soñ, how! Tolgundyryjy duşuşyk boldy. Ähli gazetlere-de iş bolduk. Açan ýeriñ biziñ suratymyz boldy durdy. Gelenimden soñ keýwanym "Sen ýygnaga gitdiñmi, ýa..." diýip gatyrgandy. Öýümizde tüweleý turdy. Ine, şondan soñam proza geçdim.
- Düşnükli. Siz "Tokmakda-da" işlediñizmi?
- Işledim. Baş redaktor boldum.
- Şonda bir gezek siz dynç güni redaksiýa gelipsiñiz. Ertesem işgärleriñize "Näme üçin düýn işe çykmadyñyz?" diýip gatyrganypsyñyz diýýäler. Şo çynmy?
- Il diýýän bolsa ugrunda bardyr. Onsoñam "Tokmakda" gün sypdyrman işlemeseñ ýetişer ýaly hem däl.
- Sizi "Tokmakdan" gyraklatdylarmy ýa-da özüñiz...
- Häzir düşündireýin. Işläm döwrümde köp tankydy materiallar bilen çykyş etdim, žurnal sahypasynda. Bir gün tokmakçylar üýşdüler-de "Çary aga, señ tankytlan zadyñ bir hili düzelip barýar. Ähli zat gülala-güllük bolsa, kemçilik tapylmasa žurnaly ýaparlar. Onsoñ bizem... diýip howatyrlandylar.
- Hä, onda Siz ýoldaşlaryñyzy işsiz goýmajak bolup özüñiz işsiz galypsyñyz-da.
- Menem işsiz ýatmadym. On bir roman ýazdym. Onnañ...
- Boldy, boldy. Sanamañ, göz degäýmesin.
- Ýörüñ, Sizem ýubileý dabarasyna çagyrýan.
- Eliñ boş gelşiksiz bolaýmasyn.
- Jübiñ boş bolmasa bor, baryber.
- Onda ýubileý dabarasyna barmazdan burun, Size bir etjek arzuwym bar. O ýerde bize gezek ýetermi, ýetmezmi, belli däl.
- Iki gulagym sizde.
- Haçan 100 prosent bolarkañyz diýip 2010-njy ýyla çenli garaşyp ýörmäñ. Siziñ on tomlugyñyzy çykarsynlar!
- Agzyñyzdan neşirýatçylar eşitsin.

Täçmämmet JÜRDEKOW.