Eje

EJE

Eje, meni şeýlebir gujaklasana,
Elleriň ýylysy, ýüregiň mähri,
Synama ornasyn, kowsun dünýämden,
Maňa ýapşak bolan sussupesligmi.

Eje, meni şeýlebir gujaklasana,
Ýumşak aýaň sypalasyn serimi.
Ýüregimiň derdi gözden syrygyp
Ýuwsun aýralygyň oýan ýerini.

Eje, meni şeýlebir gujaklasana,
Ýyly demiň ot goýbersin synama.
Çekile-çekile sapagy ýolnan,
Ýapyşalga bolsun sönýän ynama.

Eje, meni şeýlebir gujaklasana,
Undaýyn dünýäni, tutuş barlygy.
Bir pursatlyk arşda seýil edeýin,
Hemdemme öwürüp bagtyýarlygy.

Eje, meni şeýlebir gujaklasana,
Asla hiç wagt açylmasyn gollaryň.
Barlygyňda mydam bagta bürener,
Geçmeli menzillem, alys ýollarym.