Güljan Durdyýewadan goşgular

GÜLJAN DURDYÝEWADAN GOŞGULAR

MAŇA MEŇZEŞ OGLANA

Bir-birne meňzärmiş durmuş gurýanlar,
Şol-a maňa meňzemänem duranok.
Men sada söýgini halaýan, olam,
"Söýýän" diýip ölüp-öçüp baranok.

Selçeň bolmasa-da gara saçy bar,
Gaşlaram çalaja birleşikliräk.
Meňki deý kiçijek, meňki deý ýiti,
Gözlerem çukurda ýerleşipdir-ä?!

Gülende meň ýaly gülýär begenip,
Gürlände-de men dek batly gürleýär.
Gowy-da, müňlerçe adama her gün,
Salam hem-de hoş gal diýip irmeýär.

Oň niýeti gowy, gowy kalby bar,
Hiç bir zady erbetlige ýoranok.
Söýýän bolsa söýäýmeli bolar-da,
Şol-a maňa meňzemänem duranok.

• SEN GELINÇÄŇ

Sen gelinçäň seýilgähden Gün gider,
Sen gelinçäň Günüň eli sowaşdy.
Ýalňyz özüm galyp synlap otyryn,
Niçe aşyk magşugyna gowuşdy.

Sen gelinçäň ýasar guşlar höwürtge,
Sen gelinçäň döker baglar miwesin.
Nädeýin, gelseň bor lak atmankalar,
Durmuş sürtüp başlamanka igesin.

Sen gelinçäň maňlaýymdan der akar,
Ýüregim suw bolup boşar gursagym.
Men bilýän, eý görýäň, şoňçün eglenýäň,
Wagt geçenok, ýyla döndi bir salym.

Sen gelinçäň çiňňerlişip ýüzüme,
Niçe ynsan geçip gitdi deňimden.
Ýüregim biynjalyk etmänkä ýetiş,
Gorkym az däl alýan ýyly demimden.

Sen gelinçäň tomus sowlup, güýz geler,
Sen gelinçäňgüýjin ýiti:r öwgülem.
Gel ahyr, doňdurma almaga giden,
Eý, meň haýal hereketli söýgilim!