Jadyly duýgy

Awtora üstünlik arzuw edýärin. Kitapçyda ilkinji gezek görýärin Oguljennedi. Öň metbugatda, hususan-da «Daşoguz habarlary» welaýat gazetlerinde okaýardym. Birnäçe gezek özüni edebiýat duşuşykläarynda gören bolmagymam mümkin.
Goşga gelsek, duýgy bilen ýazylypdyr, gowy eken. Ýöne bärden gaýtmalar bar.

Hüýr-melekler geldiler,
Jadyly duýgym bilen,
Ylham bolup indiler,
Şygyrdyr erkin alan-

diýýär awtoryň şahyrana «men»-i. Yzyndanam:
"Saz çalyp, aýdym aýdyp, gökden salam ýollaýar". O kim? Perişdeler ylham bolup ýere indiler, ol bolsa gökden salam ýollap ýör. Düşünmedim. Ýa-ha perişdeler ýalňyşypdyrlar. Ýagny gökden inmän, ony ýokarda saz çalyp, aýdym aýdyp ýörkä göräýmeli ekenler-dä. Garaz perişdelerede ynam galmady.
Ýene awtoryň liriki gahrymanynyň hyýallary uçup ýör, ylhamdan ýaňa durup bolanok bolmaly. Agaçlaram derläp dur. Bu günler howada yssy dogrusy. Ýöne agaçlaryň derläp durmasy näme? Ol näme diýjek bolýar? Hyýallaryyň uçup ýör, agaçlaram derläp dur? Başagaý men duýmadym, sen hakda gürläp. Hä-ää, dogry, eger sen biri hakda başagaý bolup gürläp durkaň, derläniňem duýaňok. Agaçlar ýöne gürlänoklar, şonuň üçin derleýän bolmaly.

Sen hakdaky goşgular,
Ýazylypdy ýürege,
Ýeke setirim dönsün,
Gerek bolsa kürege.

Goşgynyň ahyrky bendi we setirleri örän pafosly. Edil hakyky söýginiň aýdylmadyk aýdymy ýaly gaýtalanmajak. Sözden kürek ýasap ýürege ýok ýüreklere barmak. Ine, çyn şahyryň wezipesi. Şonuň üçin agaçlaryň derläp duraanam gaty bir aýylganç tragediýa däl. Agaçlar derläp-derläp derinden derrýa döräýsin, çyn şahyryň ýekeje setirinden kürek ýasap ýürege bararys.
Oguljennet şahyra älem gowulyklaryny arzuw edýärin!
Goý owazly poeziýasy hasam joşubersin. Asman melekleriniň ýokardan inderýän ylhamlaram derekleriň ýapraklaryny derledibersin.