Özümiñki däl eken

ÖZÜMIÑKI DÄL EKEN

Özümiñki saýan dañym,
Atdy, özümki däl eken.
Ýaşlygym - bagtly günlerim,
Ötdi, özümki däl eken.

Mähriban goñşulam, obam
Ýat saýmadyk säher-sabam,
Bagrym ýakyp atam, käbäm
Gitdi, özümki däl eken.

Aga boýap saçlarymy,
Hasaplap dur ýaşlarymy,
Zalym pelek gaşlaryny,
Çytdy, özümki däl eken.

Dost saýanym diýip gülüm,
Syrym açdy ýylym-ýylym
Gije ýyldyz, Gündiz günüm,
Batdy, özümki däl eken.

Çagam boldy ömre mantyk,
Uzaklaşdy gelip agtyk,
Ýaz gelende täze pyntyk,
Bitdi, özümki däl eken.

Ýyllar öter üzlem-üzlem,
Aýakýalañ oýnan düzlem.
Ýolda goýan aýak yzlam,
Ýitdi, özümki däl eken.

Adamzat bäş günlük myhman,
Ne nyşan galar, ne-de jan.
Asyl munda bizem bir san,
Özüm özümki däl eken.

Bibigül ÝAGŞYMÄDOWA.