Rubagylar

RUBAGYLAR

Telekeçi boldy, ykbaly utup,
Baý, baýap gitdi Ata kesbin tutup.
Bar harydyn pula çalşyp gutardy —
Indi gazanç edýär lebzini satyp.

Nebse haý diýp, hak üçin urup gadam,
Soň namaz okasaň, niçik bor adam?!
Il gözüne çöp atyp eglip-galýaň —
Ýa hasaplap ýörmüň Allanam nadan?!

Dili dogada, edýäni ogurlyk,
Haýran galyp, diýseňem bu nä gylyk?!
Almaga şeýle bir endik edipdir —
Görse, haram gyldanam aljak ýolup.

• XII-XIII asyrda ýaşap, gündogar edebiýatynda guş dili adalgasyny girizen örän meşhur akyldar şahyr hem yslam ulamasy Feridetdin Attardan:

Pana ygtybar ýok, dilim guş dili,
Syrdaşym ýok, derdim aýdarym ýaly.
Hak Hossarym ýetiş guluň dadyna —
Ýalançyda ne diri men, ne öli.