Watan

WATAN

Ähli zady ýerbe-ýer —
Sahawatly, seýranly,
Ata-baba mekanym —
Garaşsyzdyr bu Watan.
Siňe baksam, ýatladyp dur käbäm bilen kyblamy,
Ata Watan, ene toprak, Garaşsyzdyr bu Watan.

Körpe wagtym ak çägesi boldy meniň oýnagym,
Undup bilmen çagalygmyň omaçaly toýlaryn.
Gorkut atam şol toýlardan alan eken boýlaryn,
Emer-damar, ho-ol aňyrdan gelýänimdir bu Watan.

Dag ýerinde daglary bar,
bardyr deňiz-derýasy,
Dag-düzleri ýaýlyp ýatyr,
giň sähradyr her ýany,
Bu ýerlere taý tapmarsyň keşt edip giň dünýäni,
Şirin janyň bagş etmäge degýänimdir bu Watan.

Bu parahat asmanymda ganatlarmy ýaýdygym,
Bütin ilim dünýä ýaýýar parahatlyk aýdymyn.
Beýik Oguz handan gelýän, parla, ýaşyl Baýdagym,
Adyn dilde sena edip gezýänimdir bu Watan.

Bu mukaddes toprak üçin kän söweşip,
kän ýeňip,
Alp Arslanlar, Togrul begler boldular baky beýik.
Şeýle uly bolsa-da,
on iki süňňüme siňip,
Kalba girip, gursagyma sygýanymdyr bu Watan.

Topragyndan çogup dur berekedi, eşreti,
Haýsy ýana seretseň ýatladyp dur jenneti,
Adyn arşa ýetiren Arkadag Prezidentli
Gözel mekan, bagtyýarlyk eýýamymdyr bu Watan.

Görogly dek ogully,
Oguz han dek kowumly,
Olar sanardan kändir bir-birinden dogumly. Ne daglydyr, ne gumly —
olar türkmeniň ogly,
Atam-babamdan galan mirasymdyr bu Watan.

Namys-arym, din-imanym, messebim hem ykbalym,
Ot-çöpleri, bag-bakjasy müň derdime lukmanym.
Eşret derýam, ylham derýam —
joşgun bilen akýanym,
Goýnunda tylla köşkler gurýanymdyr bu Watan.

Her kim gezýär ojagynda soltan bolup,
han bolup,
Eşret görýär, jennet görýär
kim gelse myhman bolup.
Şu günüme, geljegime şöhrat bolup,
şan bolup,
Diňe öňe, diňe öňe barýanymdyr bu Watan.

Bibi ORAZDURDYÝEWA.