Halyçy gelinler, halyçy gyzlar

HALYÇY GELINLER, HALYÇY GYZLAR

Sungatyňyz ýaly owadansyňyz,
Halyçy gelinler, halyçy gyzlar.
Ençe çaý-nahary sowadansyňyz,
Halyçy gelinler, halyçy gyzlar.

Her çitimi täsin dünýä deňelen,
Zehini gyz-gelin, mährem eneleň,
Eýýamlaryň eleginde elenen,
Halyçy gelinler, halyçy gyzlar.

Sungatyň serweri, gözellik täji,
Yhlasyň, söýginiň aňrybaş çägi,
Daňyň al şapagy, gülleriň çogy,
Halyçy gelinler, halyçy gyzlar.

Birisi gyzymdyr, birisi uýam,
Bu gün sungatyňyz äleme aýan,
Artsyn abraýyňyz mundan hem buýan,
Halyçy gelinler, halyçy gyzlar.