13:34 Ýör, oglum, ýör! / goşgular | |
▶ ÝÖR, OGLUM, ÝÖR!
Ýör, oglum, ýör, Ataňy gör! Biridir ol ýedi arkaň. Heniz giç dälkä görmäge, Heniz mümkinçilik barkan, Ataňy gör, Ýör, oglum, ýör, Sähra sary, burugsaýan, Garaşma:ly dynç gününe, Garaşmaly rugsada. Ýör, oglum, ýör, Ataň saňa Ýatlap berer nerdemleri, Gojalşandyr, çöküşendir Külpet gören gerdenleri. Ýör, oglum, ýör, Heniz ýaş sen, Düşünmersiň aýdanlarna. Zeleli ýok, Meňzeş olar Sary sähraň aýdymlarna. Ýyllar geçer, ulalarsyň, Aýdany galar aňyňda. Bu durmuşdyr, peýda bolar Gyssanan çagyň alnyňda. Ýör, oglum, ýör, Adam pahyr Ötegçidir tapgyr-tapgyr. Salama barmaga ataň Ýene näçe wagt tapdyr?! Garrandyr ol, garaşýandyr, Bikarar, bitakat, tapsyz. ...Oglum, salama gideli, Salam sünnetdir, sogapdyr ▶ UGRATMAK Ugratmak miýesser edenne şükür, Her kimem gidýändir bagtyny idäp. "Barybir durmuşdan görjegiň nedir?" diýip zeýrenme hem çyglama didäň. Bijeli oglan deý kaýyl ykbala, Ýaşalan ömrümde armanym ýokdur. Ýöne ýere çykylmaýar ykmana, Men görmedim, pida-gurbanyň ýokdur. Ýaşadyk ýapbaşyk, garyp kepbede, Ömrüň her aýyna baha tölendi. Gara nan her günde, çorba hepdede, Bäş ýylyň aýlawam şonuň bilendi. Köçeler gönüdir, täleýiň tersdir, Betonlara siňip bilmez mähiriň. Juda kän emgendiň, şonlugy besdir, Aklygyny bagryňa bas takyryň. Köçede satylan jalaýlyklaryň Duýduk ak bazarda bir köpükligin. Adamlar bimaksat, ýelugra, pese Puluň gymmaty deý çöküpdir göwün. Ýaşaldy aýdym-saz, bezemen-bazly, Ýöne ýatlanmady garyp mazary. Bipaýan ýalançyň aldawy azmy, Hemem garabagra goýan azary?! Ýatlama dolanmak parzdyr munda Ugratmak borjumy haklarym ýaly. Küýseseň ýaýdanma, ýatla her günde Geçmişiň geljegi aklary ýaly. Ugrasaň, aman bar, dilegim şoldur, Ädimleriň arzuwyňa gowuşsyn! Köne ýurda barsaň, bir töwir galdyr, Kynçylykda Hydyr ata duşsun ▶ SÖÝMÄN GEZMEKLIGEM MERTLIK Durnalaram toýnuk gurmaz owazsyz, Düşün sözlerime, “zeýrenýär” diýme. Ykbalyma öňki yşgym sowapdyr, Täleýim meňzeýär tikenli sime. Günler bäsdeş eken meniň ömrüme, Soňsuz gussalarmyň ýylgyrmaz dişi. Dostlar diýýä: “keýp edeli her güne” Göwnüme ýakanok olaň bu işi. Düşünemok, ýöne bir zady bilýän, Iki dünýä ýeke gezek ýanara, Azapsyz günleri azaply dünýäň Asla indi güýç berenok damara. Bu günlerem baky durmaz gaşyňda, Berilenleň bary şertli ekeni. Owadan gyzlary aýny ýaşyňda Söýmän gezmekligem mertlik ekeni. * * * Ugratmak miýesser edenne şükür, Her kimem gidýändir bagtyny idäp. "Barybir durmuşdan görjegiň nedir?" diýip zeýrenme hem çyglama didäň. Bijeli oglan deý kaýyl ykbala, Ýaşalan ömrümde armanym ýokdur. Ýöne ýere çykylmaýar ykmana, Men görmedim, pida-gurbanyň ýokdur. Ýaşadyk ýapbaşyk, garyp kepbede, Ömrüň her aýyna baha tölendi. Gara nan her günde, çorba hepdede, Bäş ýylyň aýlawam şonuň bilendi. Köçeler gönüdir, täleýiň tersdir, Betonlara siňip bilmez mähiriň. Juda kän emgendiň, şonlugy besdir, Aklygyny bagryňa bas takyryň. Köçede satylan jalaýlyklaryň Duýduk ak bazarda bir köpükligin. Adamlar bimaksat, ýelugra, pese Puluň gymmaty deý çöküpdir göwün. Ýaşaldy aýdym-saz, bezemen-bazly, Ýöne ýatlanmady garyp mazary. Bipaýan ýalançyň aldawy azmy, Hemem garabagra goýan azary?! Ýatlama dolanmak parzdyr munda Ugratmak borjumy haklarym ýaly. Küýseseň ýaýdanma, ýatla her günde Geçmişiň geljegi aklary ýaly. Ugrasaň, aman bar, dilegim şoldur, Ädimleriň arzuwyňa gowuşsyn! Köne ýurda barsaň, bir töwir galdyr, Kynçylykda Hydyr ata duşsun! * * * Indi il içinde, saýrak dillerde Özge hakda aýdym bolsa-da meşhur. Seniň gülgün reňk, gül pisint keşbiň Meniň ýüregimde heýkel boup dur. Ondan soň kän ýagyş-garlar ýagypdyr, Sen ýadyma düşdüň öňräjigem. Şonda men duşupdym rubap oýnap, Yşk hakynda aýdym aýdýan täjige. Onuň bir sözüne düşünmesemem, Ýürek derdi belli gamgyn sazyndan. Hoşlaşdym oň bilen "teşekkor" diýip, Aý ýaşyp gidensoň, gijäň ýarynda. Hemme zat ýadyňdan çykyp durmaýar, Aýlar öwrüm berip, ýyllar geçse-de. Ýogsa ýokdur, bolan-goýan işleri Ikimizden başga gören-eşdenem. Indi il içinde, saýrak dillerde, Özge hakda aýdym bolsa-da meşhur. Seniň gülgün reňk, gül pisint keşbiň Meniň ýüregimde heýkel bolup dur. * * * Nam-nyşan ýok gussadan hem ajy aýralykdan, Şatlygam ýok ýürekde, urup dur maýdalyna. Men indi halys boldym ýasama saýramakdan, Belki, gulak asýan bardyr ýürekden aýdanyňa. ...Ol gün, Heýhat gününde kim meni halas eder, Ne dostdan, ne gardaşdan, hiç kimden bolmaz haraý. Geler gazap perişdesi meni süýrär äkider, Derwezesin giňden açyp garşylar otly saraý. Günäm näme?! Iller kimin ýaşadym, kä ýaňyldym, Haram iýmekden gaçdym, bolsamam men hor-homsy. Uly işler etmekçidim, döwüm nana daňyldym, Onam elinde saklady dünýe atly orramsy. Şonda güňleç ses eşdiler: "Seni Ýaradan barka, Umyt bagladyň başga, bizden gaýry bir kese. Kime ynanan bolsaň, git, şondan gözle arka". Otly saraý has beter möwç urar güňleç sese. Şonda meniň dadyma ýetjek bolmaz, eger-de Ýazmasam ýüregimi, ylhamyň owazyny. Ol derdime melhemdir onda hemem bu ýerde, Dar kalbymy giňelder, täzelär howasyny. Nam-nyşan ýok gussadan hem ajy aýralykdan Ýürekde diňe gorky, şodur ýeke-täk aýbym. ...Indi men halys boldum ýasama saýramakdan, Indi gözlegim bolar diňe hakyky aýdym. * * * Ähtimal, bu bolar iň soňky ýola, Aladaly hem mähriban bakyşly. Gözleriňi ine-gana synlanym, Elwan ýaşlygymyň öçmejek yşgy. Çünki, durmuş diýlen töwekgel oýun, Alajyň ýok näme düşse bijäňe. Şonuň üçin yhlas bilen bakýaryn Mähriban hem aladaly didäňe. Biziň erkimizde näme bar? Ýogsa Gör nämeler ýokdy arzuw-hyýalda. Hut şu günki ýaly ýadyma düşýär Arzuw edenimiz - bu günler däldi. Zeleli ýok, gözýaş etmez bijeli, Ýöne men gyýylýan ýalňyz bir hala: - El ber, hoşlaşaly, mährem dideli, Ähtimal, bu bolar iň soňky ýola.. ▶ KURSDAŞLARYMA Men sizi küýseýän ýürek gysanda, Ýatlamda ýaşlygmyň geçip gidenni. Üýtgeşik owadan gyzlardyňyz siz, Hem oglanlardyňyz juda edenli. Belki, bu zatlaram nesibedendir, Ynjyk ýatlamalaň gussasy bardyr. Size täze günler nesip edendir, Oňam ýaşar ýaly nusgasy bardyr. Guwanýan, damagym dolýar ýatlasam, Ýüzsemdim şol gamsyz günleň kölçesin. Eý ýaşlygym, sen üýtgeşik atlysyň, Ony özge atdan bölüp-bölçesem. Ýanymda hemişe hemram aýralyk, Hemem şu gijeleň ukusyzlygy. Bar tapan zadym şu sizden aýrylyp, Uly ýutgimiň hem biri sizsiňiz. Men sizi küýseýän ýürek gysanda, Ýatlamda ýaşlygmyň geçip gidenni. Üýtgeşik owadan gyzlardyňyz siz, Hem oglanlardyňyz juda edenli. ▶ HOŞLAŞYK Ine, hoş gal diýip ugrady otly, Ine, hoş gal diýip galgady desmal. Şol geçen günleriň ahmyr-armany Ajy hasrat bolup howumy basýar. Giç agşam penjiräň aýnasyn açyp, Çümüp uç-gyraksyz süýji arzuwa Diýipdiň ahyry: "Bir ýagyşly gün Uçarys asmana, öwrülip guwa". Munça aýralyga sebäp barmydy, Ýa barmy bakyşyň aýyp-syn eden. Maňa başga zat galmady dünýede Ýaşamakdan bez-bez bolan synadan. Ýok indi dünýede ýadaw göwrämden, Teň halymdan başga bir zerre meýdim. Sen şonda nämüçin janymy ýakyp, Iň soňky biçüwli köýnegiň geýdiň? Şonda soňky ýola syrly ýylgyryp, Özge söz ýok ýaly, diýipdiň: "Hoş gal!" Seniň şol sözleriň esse hasraty Meniň hasratymyň üstüne goşýa Meretmämmet HANMÄMMEDOW. | |
|
√ Perişan kalbyñ umydy / Goşgular - 01.01.2024 |
√ At galar / Goşgular - 11.02.2024 |
√ Meniñ monologym / Goşgular - 01.01.2024 |
√ Nar / Goşgular - 22.04.2024 |
√ "Gelin jan..." / Goşgular - 26.03.2024 |
√ "Diýdiñ: Gelin bolup görkezeýinmi?.." / Goşgular - 14.02.2024 |
√ Puluň başarnygy barada agymtyl goşgy / Goşgular - 10.01.2024 |
√ Goltugy daşly adam / Goşgular - 05.01.2024 |
√ Şert / Goşgular - 09.02.2024 |
√ "Bagşylara" / Goşgular - 07.02.2024 |
Teswirleriň ählisi: 4 | |
| |