Aýal dogan

AÝAL DOGAN

Neçüýn gözleriň gülenok,
Ümürli sen, aýal dogan?
Aýaklam boýun egenok,
Gapyň maňa hyýal, dogan!

Bagtyň bizi ýyladyp ýör,
Göz degmesin günüňize.
Saňa ýüz berip bilemok,
Ýüz berýänlem ýüzüm ezýär.

Öýkeläňok öňküler deý,
Arada yssy ýylgyryş.
Durmuş bizi böldi ikä,
Uzaklaşýas garyş-garyş.

Seni mydam begendirip,
Beresim gelýär bir zatlar.
Ýöne ýok meniň elimde
“Sag boldan” başga hiç zadym.

Neçüýn gözleriň gülenok,
Ümürli sen, aýal dogan?
Aýaklam boýun egenok,
Gapyň maňa hyýal, dogan!

Enwer NYZAMOW.

Surat: Pablo Pikasso / "Iki uýa", 1902 ý.