MAZARYSTANDA
Ol ýatan nähili adamdy, kaka?
– Gyzyl deý adamdy, niýeti ýagşy.
Bu ýatan nähili adamdy, kaka?
Gymmatçyl diýmeseň, bagşydy bagşy.
Ol çetdäki aýal neneňdi, kaka?
– Mertdi, ary üçin ärden geçipdi.
Bu zenana bahaň neneňsi, kaka?
– Onda baha ýokdy, göwni açykdy…
Ol ata nähili atady, kaka?
– Sadady, kösenip ötürdi ömrün.
Bu ene nähili enedi, kaka?
– Mähremdi, göteren bolmady göwnün.
Kaka, onda neçüýn diri adamlar
Dürli gylyklara paýlanýarkalar?
Bulaň bary gowy ynsanlar bolsa,
Erbetler nirede jaýlanýarkalar?
* * *
Zyýarata geldim mazarystana,
Bu ýerem özge bir dünýä bolupdyr.
Şu tümmekleñ bary ynsan bolaýsa,
Obamyzyñ özünden milýon ölüpdir.
Köşkde ýaşanlaram tümmek bolupdyr,
Öýde üşänlerem tümmek bolupdyr...
Hanha ýatyr obañ çyn aşyklary,
Olar bir-birini çyndan söýüpdir.
Beýleräkki tümmekdäki aýaly,
Äri namys edip, özi soýupdyr.
Çyndan söýenlerem tümmek bolupdyr,
Hat-da soýanlar tümmek bolupdyr...
Beýleräkde ýatyr bir alym aga,
Ol ýaşan ömründe ylyma uýupdyr.
Onuñ ýanyndaky ylymyñ deregne,
Guş dek beýnisine şerap guýupdyr.
Ylma uýanlaram tümmek bolupdyr,
Şerap guýanlaram tūmmek bolupdyr...
Şu sözi bahana edip kän ynsan,
Öz ýüwrek aýagyn özi çilip dur.
Tümmekleriñ tapawudy bilseñ kän,
Köpler añmasa-da bilýän bilip dur.
Biri güller örten tümmek bolup dur,
Biri ýeller ýyrtan tümmek bolup dur...
Kerim HALLY.
0
