Meniñ juda ýagşa meñzäsim gelýär

MENIÑ JUDA ÝAGŞA MEÑZÄSIM GELÝÄR

Meniñ juda ýagşa meñzäsim gelýär,
Ýagsam beýiklere, ýagsam tekize.
Topragyñ süññüne ornap serginlik,
Ýeriñ ýüzi bolsa ajap, päkize.

Meniñ juda ýagşa meñzäsim gelýär,
Giñ sährama göwher hünji sepsedim.
Güýzde myhman bolan bahara dönüp,
Ýapraklary ýekän-ýekän öpsedim.

Meniñ juda ýagşa meñzäsim gelýär,
Örülsedim sonalaryñ ýelegne.
Çüwen ykballara ak pata berip,
Ýetirsemdim aşyklary dilegne.

Meniñ juda ýagşa meñzäsim gelýär,
Boz ýerlerde läle bolup güllesem.
Tarlaryna monjuk ýaly düzülip,
Gül gyzlaryñ saçlaryny öllesem.

Meniñ juda ýagşa meñzäsim gelýär,
Çabga bolup bu zemine eñsedim.
Damjalara mährim bolup garylyp
Ýere däl-de ýar ýüregne siñsedim.

Oguljemal ÇARYÝEWA.

"Edebiýat we sungat" gazeti, 1978 ý.