Rubagylar

RUBAGYLAR

Möjek möjegi iýmeýär,
Köşek köşegi iýmeýär.
Ýöne weli adam diýlen,
“Adamy iýmen” diýmeýär.

22.04.2023.

***

Durmaly zat dursa gowy ýerinde,
At çapmasyn jynlar azgyn serinde.
Bigünä biriniň ganyna galyp,
Pakgaryp diýme sen: “Güýç bar berimde!”

26.02.2023.

Men bu gün nähili bagtly adam,
Maňa eziz bu gün ýakynam, ýadam.
Görüp, ýöräp ýaşap ýörkäň jahanda,
Asla geregem däl eken köp zadam.

26.04.2023.

***

Öňki gadyrdanlar darkaşda indi,
Şeýtana al salan gardaşdy indi.
Ýagşy kaýda, ýaman kaýda, şer kaýda?
Ýagşy, ýaman... bary garyşdy indi.

29.04.2023.

***

Azdyrmasyn gardaşyňy gardaşyň,
Şudur munda iň ýamany gargyşyň.
Ýoluňy alaman çalan ýalydyr,
Başa barmaz ol mübärek argyşyň.

01.05.2023.

***

Hoş günümde gelseň-de sen hoşuma,
Dostum diýmen iş düşinçä başyma.
Diýsem göwün etme, gardaş diýenim
Gelip bir gün awy gatmyş aşyma.

01.05.2023.

***

Öwgüli zamanda ogry köpeldi,
Takala baş egen “dogry” köpeldi,
Çölde şagal görse ýazzyny berjek,
Oguz, Gorkut ata, Çagry... köpeldi.

06.05. 2023.

***

Göwnüň hoş bolmasa, ne derkar malyň?
Belki-de, mal-mülküň beter zyýanyň.
Jahana ýalaňaç inen, eý, kişi,
Ýalaňaç bolmasyn ömür beýanyň.

05.05.2023.

***

Hristianlar ýaşap ýörler çokuna,
Musulmany äňetmeýä ikona.
Behişt bilen dowzah jenjeliň başy,
Barybir gidersiň şo bir mekana.

08.05.2023.

Soraň baryp derdin şöhratparazyň,
Misli bir tirýeki çekýär azaryn.
Niçe ses etse-de gije we gündiz,
Suw bolmasa bady ýatar harazyň.

15.05.2024.

***

Jeň meýdany adamlaryň bir-biregi gyran ýeri,
Zalymlaryň bu halyna arşda Allaň iren ýeri.
Megerem, adam şeýtandan - bir-birege düşünmeýär,
Biri gaçýar, biri kowýar, togalanýar kelle bary.

15.05.2024.

Çärýek asyr ýalňyzlykda bekäniň,
Aldyňmy halyndan habar ýekäniň?
“Niçik?” diýip, açdyňmy sen gapysyn,
Ýalňyz ýatan, belki, daýyň, çykanyň...

23.05.2024.

***

Kim gan içýär kalby doly gahardan,
Kimseleriň doly gäbi zäherden.
Diýseler diýsinler şahyra “Serhoş”,
Şahyr serhoş mydam gülli bahardan

16.05.2024.

* * *

Aldygyna goşgy ýazýar ol bende,
Ýazanynda näme, goşgusy gende.
Kitabyny “Wtorsyrýo” tabşyrdym,
Ýygnaýar ol köne –küşül hem jinde.

13.06.2024.

***

Oglan-uşak, garry-gurty barysy,
Metjitdedir obamyzyň ýarysy.
Wah, meňem Käbäni göresim gelýär,
Agyr eken berilmeli parasy.

13.06.2024.

***

Gara sahypasy az däl taryhyň,
Niçik zabun soýulmagy şahyryň?!
Soýup bilýän bolsa adam - adamy,
Gaçmazmy, heý, onsoň güýji Gurhanyň?

13.06.2024.

***

Hruşew, Brežnew, Gorbaç oýnaldy,
Hem alkaş, heleýbaz Ýelsin... oýnaldy.
Oýnalanlar gitdi, oýnanlar gitdi,
Oýnalanyn haýsy biri boýun aldy?!

13.06.2024.

***

Biwepany gözläp ýörme sen daşdan,
Gözleseň taparsyň öz maşgalaňdan.
Bi ne beýle diýip geňleme gardaş,
Bu seniň öz terbiýeläniň başdan.

13.06.2024.

BENTLER

Alymyň gara galamy,
Röwşendir serkerdäň gyzyl ganyndan.
Ibn Sina müň mertebe beýikdir,
Dünýäni düňderen mongol hanyndan.

***

Polatdan ýasalan jöwher pyçagy,
Eredip bolýandyr ýasap çakgyjyk.
Güneşiň öňüni baglajak bolma,
Eý, sen, bu gün ýei berilen pökgüjik.

12.06.2024.