Nohurdan gelýärdim...

NOHURDAN GELÝÄRDIM...

Nohurdan gelýärdim, ýüküm almady,
Bir gözele duşdum—nazar salmady.
Içdim gana-gana çeşme suwundan,
Ýöne weli gyzdan gözüm ganmady.

Nohurdan gelýärdim, ýüküm enardan,
Bir gyza sataşdym—boýy çynardan.
Şol tez maral gaýyp boldy gözümden,
Wah, tez maral meni ýakyp-ýandyran.

Nohurdan gelýärdim, ýüküm üzümdi,
Baglarynda üzüm düzüm-düzümdi.
Alma ýaňak, çynar boýly enar gyz—
Ýoluma garaýan gara gözümdi.

09.10—16.12.2010ý.

▶ÝÜREK

Dost gitdi kyrkynda,
Ýygladyň, ýürek.
Atanyň agysyn aglap,
Jahana sygmadyň, ýürek.
Duz-emek bolanyň haýýarlygyny
Geňlediň, ýürek.
Jyda düşüp syrdaşdan,
Eňrediň, ýürek.
Azar çekip gardaşdan
Iňlediň, ýürek.
Perzent atly şeýtanyň
Ezýetine çydadyň, ýürek.
Şeýde-şeýde altmyş ötdi,
Diýmediň “Ýadadym!”, ýürek.

Tilkileriň zeperinden,
Eşekleriň deperinden,
Kyrk emjegiň “çeperinden”,
Aman sakladyň, ýürek.
Gidip şeýtan alyna,
Eräp-akmadyň ýürek.

Sen urýakaň gursakda,
Diri men her pursatda.
Eý, sen hökmurowanym,
Saňa bagly dowamym.
Eý, melhem ýürek,
Hem merdem ýürek!

22.03.2011ý.

▶ AWAZANYŇ AÝDYMY

Çarlaklaryň oýnundan
Baksaň gözüň doýmaýar.
Tolkunlaryň owazy
Öz erkiňe goýmaýar.

Durky bilen tebigat
Eýlenipdir owaza.
Jana melhem tenekar,
Myhman barsaň Awaza.

Gözellikden hanasy,
Aşyk ynsan balasy.
Bardyr haýran galasy,
Gül-gülüstan, Awaza.

Eşreti bar, eşreti,
Her damjasy eşrepi.
Ýatdan çykmaz hezzeti,
Myhman barsaň Awaza.

Gelip gören haýrandyr,
Owazasy ýaýrandyr.
Şanyna dil saýrandyr,
Dilde dessan, Awaza.

26.03,2010ý.

▶ SAŇA DUŞALYM BÄRI

Saňa duşalym bäri,
Bilbilem men, gülüm ýok.
Saňa duşalym bäri,
Aglamadyk günüm ýok.

Asmandan nur ýagady,
Gara bulut dagady.
Ýitirip men takady,
Saňa duşalym bäri.

Eziz gördüm adyňy,
Kalpda ýakan oduňy.
Eşitmediň dadymy,
Saňa duşalym bäri.

Diýme maňa diwana,
Waspyň geldi zybana.
Geldim, a gyz, amana,
Saňa duşalym bäri.

Ykbalym sen, halym sen,
Jigerimde janym sen.
Söýgüli aýalym sen,
Saňa duşalym bäri.
    
18.04.2011ý.

▶ TÜRKMENIM

Röwşen tapdy Bagtyýarlyk galkymy,
Nura çaýdy Türkmenistan halkymy.
Gurulmyş binanyň polat Galkany,
Gezýär sahawatyň Zemin, türkmenim.

Sarsmaz sütümi sen gadym asyryň,
Oguz han türkmenden gaýdýandyr aslyň.
Görogly gaýratyň, Gorkut paýhasyň,
Paýyň bar Jemşitli jamdan, Türkmenim.

Gündogar, Günbatar, saňa maýyldyr,
Alkyşnama ýüreklerde jaýyňdyr.
Paýhasyndan eziz Watan gaýymdyr,
Beýik taglymatyň—Ynsan, Türkmenim.

Ýaşamak ne hezil, döwür ajaýyp,
Ömre ömür goşýan ömür ajaýyp.
Watanyň adyny jahana ýaýyp,
Başyn egýär saňa Zaman, Türkmenim.

                
29-30-.04.2011ý.

▶ YŞK GOŞGUSY

Men ganasym geldi dünýäň lebinden,
Lebi asal, dili şirin, dildarym.
Zowky-sapa, humar aldy serimi,
Birsalym goýnuňda boldum bimaram.

Dünýäniň yşkyndan doýan ýok, doýan,
Bu saňa-da aýan, maňa-da aýan.
Çünki dünýäň özi yşkdan ýasalan,
Elden aldyryp men sabr-u---kararym.

Kalbymdaky sowulmajak ýaz şondan,
Aňzak gyş, jöwzaly tomus, güýz şondan.
Hem ýakyp-ýandyran yşk köz şondan.
Dünýä bilen ömür galmak hyýalym.

Tagzym kyldym yşkdan jan berene,
Tagzym kyldym dünýä atly erene.
Göwsüm gerip öwsen jahan eline,
Gözleý-gözleý takabilmen dildarym.

30-05-02.06.2011ý.