SYÝA ÇÜÝŞÄME
Pişelermiñ hemsyrdaşy
Eý, meniñ syýa çüýşäm,
Senden nagyş alypdy
Şatlygym hem endişäm.
Men meýlisiñ hemrasy,
Meýi ýatdan çykaryp,
Senden aýrylşyp bilmändim
Bagrym saña kökerip.
Pukaraja külbämde
Gam-gaýga ulaşamda,
Çyra,arzuw üçiñiz
Otyrdyñyz gaşymda.
Ýüregim joşan pursady,
Gelip seniñ ýanyña,
Ylhamymy çagyrypdym
Hyýalymyñ alnyna.
Ýeñiljek akja tüsse
Üstünde aýlanjyrap,
Ol tüssäniñ içinde
Galpyldap, towlanjyrap,*
Başga işlerden boş wagtym
Sen bolduñ ýakyn hemram.
Ýaltalygma öwrenşipdiñ,
Şoldy mähriban jorañ.
Men, näbelli terkidünýä,
Arkañdan atly boldum.
Teniñden keramat alyp,
Mukaddes otly boldum.
Agşamara depderimde
Perom şaglaýan wagty,
Señ içiñe çümüp-çykyp,
Sözler saýlaýan wagty,
Señ düýbüñden çykarypdy
Sesleñ, sözleñ owazyn.
Setirleriñ gelşigin,
Ajy degişmäñ duzun.
Hakykatyn gazabyn,
Pikirleriñ geregin,
Görülmedik kapyýalañ
Seýreginden seýregin.
Geýimlerin çykaryp
Zoilleñ**, nadanlaryñ,
Seniñ syýañ reñki bilen
Bezäpdim endamlaryn...
Ýöne hiç wagt señ syýaña
Şer suwuny goşmandym.
Ýalynjañlyk, dönüklik
Läbigne bulaşmandym.
Ýöne welin bu mekanda,
Iş-pişe arasynda
Olañ näzik owazy
Gelip durka gulagma,
Çolaşyp bilerinmi
Biwepalyk duzagna?
Mahal-mahal unudyp
Daktil bilen horeýi,
Mähriban dostlaryña
Ýetirmäge haraýy,
Poçta tarap ylgap git
Rifmasyz kyssa bilen,
Aýralyk derdi bilen,
Içgysgynç gussa bilen,
Hyýal hem arzuw bilen,
Umyt hem duýgy bilen,
Pürepürle kagyzy
Dostlaryña söýgi bilen...
Setirleñde bolmasyn
Ýalynjañ hem galp sözler.
Ýañra, degiş, dostlaryñ
Ýüregine teselli ber...
Biagyrylyk keselinden
Ýanym ýere berýänçäm,
Meñ bilen aýrylyşman,
Jetleşmän, agyryşman,
Ömür sür, syýa çüýşäm.
Bir gün dowzah holtumy
Meni baky ýuwdanda,
Göz guwanjym galamym
Baky uka gidende,
Bir dulda ýetim galyp,
Doñup, boşap gidersiñ.
Şahyryñ asuda öýün
Baky taşlap gidersiñ.
Onsoñ seni äkider
Çaadaýew söwer dostum.
Gamgyn dostuma menden
Soñky ýadygär borsuñ!
Suratyñ arasynda,
Boşap, kepäp galarsyñ
Kaminiñ gyrasynda.
Ömürlik dilden galyp,
Şo ýerde uka bat sen.
Köşküñ ynjyk nazaryndan
Özüñ uzakda tut sen.
Diñe eziz dostlarma
Şahyr dostun ýatlat sen.
Terjime eden: Kerim GURBANNEPESOW.
■ ÝAKYLAN NAMA
Hoş indi, söýgi haty! Gyz aýdypdy ''ýak'' diýip,
Seni ýakman kän gezdim kä örtenip, kä köýüp.
Yşk şatlygym ýakmaga dözenok meñ ellerim,
Ýöne besdir, wagt boldy, indi ýakman bilmerin.
Taýyn men, ýanan kalbym hiç zady diñlemeýär,
Horan oduñ alawy haty ýuwdup-ýalmaýar.
Dem salymda labyrdap, göründi ajy tüsse,
Nädeýin men, ýandy ol dert goýup derdim üste.
Wepadarlyk ýüzügi öz güýjüni öçürdi.
Bolubildi! Kagyzlar garaldy-da, bürüldi.
Ýeñil külde akjaryp, hatyñ yzy göründi,
Gussa doldy gursagym, eý, sen maña eziz kül!
Ýürek ýarama sepsem, melhem bol köýen jana,
Baky gal ykbalymda, ylham bol söýen jana...
■ KOZLOWA
(''Monah'' poemañy alanymdan soñ)
Şahyrym, haçanda seniñ öñüñde
Tüm dumana duwlananda bu zemin,
Bada-bat oýandy ukudan geniñ.
Bar geçmişiñ geldi yzyna gaýdyp,
Ýagty salgymlaryñ üýşmeleñinde
Başlady ajaýyp aýdymlar aýdyp.
Eziz dogan, gör, nähili owazlar!
Tolgunyp, gözýaşly gulak asýaryn.
Asmandan dökülýän ylahyý sazlar
bilen gaýgy-gamlarymy basýaryn.
Ol saña täze bir dünýä ýaratdy,
Sen onda görýärsiñ, göge uçýarsyñ.
Hem täzeden ýaşap, öpüp-guçýarsyñ
Bireýýämler döwlen zehin daragty.
A men, öz ýekeje şygrym bilenem
Şatlyk goşsam şatlygyña bada-bat,
Ondan başga sylag-serpaý islemen.
Dünýäniñ tümünde görmän ýagtylyk,
Geçdim men çöllerden, ýaşadym şeýle.
Ýok-la! Bu ýaşaýyş hemem şahyrlyk
Ýöne ýerden berlen däldir täleýme!
Terjime eden: Atamyrat ATABAÝEW.
■ ŞÖHRAT ARZUWY
Söýgüden sermest bolup, men keýp çeken wagtymda,
Garşyñda sessiz durup, dyza çöken wagtymda,
Saña garap oýlanyp, diýýardim: meñkisiñ, ýar,
Bilýänsiñ, şöhrata hiç etmedim men ähtibar.
Bilýärsiñ men howaýy älemden çykdym daşa,
Öz şahyr adym üçin darykdym hetdenaşa.
Bu joşýan tupanlaryñ arasynda galmadym,
Güwläp gelýän gyýjyta, öwgä gulak salmadym.
Humar gözleriñ bilen ýüzüme nazar salyp,
Saçlarymy sypalap, kereşme-näzli gülüp,
Ýuwaşjadan diýýärdiñ: ''Söýýärmiñ, bagtyýarmyñ?
Özgäni söýmezmisiñ, maña wepaly ýarmyñ?
Hiç wagt unutmazmyñ meni, söýgüli ýarym?''
Başga gep eşitmäge barmdy ygtyýarym,
Tapmazdym oña jogap, göýä uka gidýärdim,
Zowky-sapa gark bolup, şeýle hyýal edýärdim:
Geljegim meñ röwşendir, hijranly gijäñ tümi,
Ömür büräp almaz hiç bu dünýäde üstümi...
Emma bir gör, nätdiñ sen! Üstüme ýerli-ýerden
Hyýanat, töhmet, azap, gözýaşlar iýndi birden...
Indi göýä men çölde bir ýolagçy, tupan, gaý,
Ýyldyrym göz açamaga hiç bermeýär maña maý!
Indi bir arzuw edýän: her sagat adym, şanym
Seniñ gulaklaryñda örän batly ýañlansyn,
Her bir söz, her habarda meñ pikirim añlansyn.
Hak sözi diñlär ýaly ýalñyz galan badyña,
Degre-daşyñda bar zat meni salsyn ýadyña.
Garañky gije bagda, gamly hijran çagynda,
Iñ soñky ýalbarşymy ýene ýatlarsyñ şonda.
Terjime eden: Ýakup NASYRLY.
_______________________
* Şu setirden soñ Puşkiniñ golýazmasyndan bir sahypa ýitipdir.
** Zoil ㅡ gadym grek edebiýatynyñ adalatsyz tankytçysy.
