Ylham gözbaşy

YLHAM GÖZBAŞY

Gözeller içinde gördüm bir apat,
– Ýok, apatam oňa gurbanlardandyr.
Kerim Gurbannepesow.

Habar berip size, edeýin yglan,
Ol, ylham gözbaşy galam alana.
Mylaýym bolşunda göwnümi awlan,
Waspyn ýaýmak mahsus, şahyr bolana.

Perwanadyr hak aşyklaň barysy,
Laýyk mynasyby bäşden birisi,
Özi ýalkym, sözi şeker şiresi,
Ömre ömür goşar, nazar salana.

Bugdaý reň ýüzünde aýyň jemaly,
Geýinşinde görner, akyl kemaly,
«Meger taýy ýokdur hut, özi ýaly»,
Diýsem hakykat bor, çykmaz ýalana.

Bir enaýy, gabat gelse öňümden,
Salamlaşyp, gülüp geçse deňimden,
Ýagtylyk ýol arçar, kalbyň tümünden,
Ýene umyt bolar, tama ýolana.

Sagdyn syratyna dolmaçlyk kakar,
Gözüm görüp doýmaz, mežbury bakar,
Muhabbet lezzetin dadana ýokar,
Dirilik suwudyr, şehit ölene.

Tarypa sözlerim gury owazdyr,
Soňky deme deňeç harlansam azdyr,
Diýlendir: «Ýel soňun ýagyşa ýazdyr»,
Arzym budur, baksa, gadrym bilene.

Bagtym çüwüp, pursat gelse çemime,
Degşip durup, demin dartsam demime,
Süňňüm ýeňlär, dowa bolar emime,
Bilbil bolup gonsam, bagyň gülüne.

Göz-dilden gorasyn, dik bolsun başy,
Bagtyna buýsanyp, uzasyn ýaşy,
Söz salgyma saýsa, sahyp syrdaşy,
Arzuwymdyr şol, näzenin geline.

Illi sözle, syryň galmasyn pynhan,
Oňa gurban bolsun, tende şirin jan,
Ynjamasyn, bizden ýetmesin zyýan,
Bir gün, gülden, çemen bersem eline.