ÇYRA
- Balam, gurgunmyň - diýip, indi segsene ser uran Kömek aga agajyň kölegesinde myllaryp oturan Hoşgeldä habar gatdy. - Näçinji synpda okaýaň?
- Üçünjide!—diýip, Hoşgeldi göwünsiz jogap berdi.
- O-oh-ow, üçünjide dagy okaýan bolsaň-a, uly ýigit çykan bolmaly, sen. Onda, sen salam bermediň-le, ýa-da...
- Ýadymdan çykypdyr-laý. - diýip, Hoşgeldi sypajyklady.
Kömek aga başyny ýaýkady.
- Şeýle-dä, şeýle-dä, heý, salamam bir ýatdan çykararlarmy?! Bolmaz-a , köşek. Biziň salamdan başga näme baýlygymyz bar! Onam.. - Ýaşuly Hoşgeldiniň ýüzüne siňe garady.
- Sen nädogry çyraňy ýakypsyň, oglum. Beýtme, ony düzet.
Hoşgeldi birhili bolup, Kömek aganyň ýüzüne geň galyp seretdi.
- Hawa, hawa, geň galma, sen başga çyrany ýakyp, gezip ýörsüň.
Hoşgeldi geň galmasyny gizlemedi.
- O nähili çyr-a-aý?!
Kömek aga bilini ýazmak üçin, hasasyna daýandy-da, az-kem dikgerildi.
- Allatagala ynsanyň köňlünde iki sany öý gurandyr. Bir öý garajadyr. Onuň çyrasy-da körekdir. Ynsan şol garaja öýe girip, körek, zordan ýagty berýän çyrasynam ýakman gezse, onda, ol ýalta, geleňsiz, görüp bolýandyr. Onuň üçin dünýäniň gyzygy bolmaz. - Ýaşuly ýöräp başlady. - Emma ynsanyň köňlünde ýene bir öý bardyr. Ol öý ap-akjadyr. Onuň ýagty çyrasynyň şuglasy ynsany bagtly eder. Onuň ruhuny beýik eder.Beýle adamlar gaýratly, adamkärçilikli bolýandyr. Ine, senem şol akja öýüňe girdejik, çyrasynam ýakyp goýber! Gaýdyp, ýaltalyga, geleňsizlige ýüzüň düşmez. Hoş, sag bol, guzym!...
Howa yssydy. Ýöräsiň gelenokdy. Göwnüň sowujak suw küýseýärdi. Hoşgeldi Kömek aga gidenden soň, onuň aýdyp beren şol ak öýi, ýagty, ýalkymly çyrasy barada çyny bilen oýlandy. Hyýalynda köňlündäki şol ak öýe girdi-de, onuň çyrasyny ýakdy.
Hoşgeldiniň göwni galkynyp gitdi. Onuň dünýesi nura dönüp, süňňüne kuwwat geldi. Gursagy begençden doldy. Indi yssy-da, ýadawlygam, ýaltalygam onuň ýadyna düşenokdy. Onuň ganat ýaýyp, parlap uçasy geldi.. Şondan soň ol bütin ömrüne köňlündäki şol garaja öýe-de girmedi, ondaky körek yşykly çyranam ýakmady. Indi onuň keramatly şygla saçyp duran çyrasy bar ahyryn...
30-njy aprel 2004 ý.
Öwezdurdy NEPESOW.
