Ikimiziň aramyzda

IKIMIZIŇ ARAMYZDA

Sary sähra dymyp otyr
Ikimiziň aramyzda.
Dogum bizsiz oňup otyr
Ikimiziň aramyzda.

Ýer aýlanýar (Okuna güýç!..),
(Ýaryl, ýürek! Ornuňdan süýş!)
Düýnler ýatyr, görýändir düýş
Ikimiziň aramyzda.

Günler — çaman, ömür — ýyndam,
Paýhas — çaman, göwün — ýyndam,
Geçip ýadamaz bu ýyllar
Ikimiziň aramyzda.

Syýa reňkli gamlar artar,
Gije geçer, daňlar atar,
Söýgi ölmez — iňlär ýatar
Ikimiziň aramyzda...

02.10.2018ý.

Sapa HOMMADOW