Ynanma

YNANMA

Gürlese-de mydam gataltman sesin,
Pul üçin görkezer gylygyň pesin.
Nebsin öňe atan beýle näkesiň,
Ýalymyna-ýulumyna ynanma.

Baýlyk üçin geçer öz gardaşyndan,
Minnetlidir, datma beren aşyndan.
Salykatly görünse-de daşyndan,
Sözlerine, ylymyna ynanma.

Pul diýp edýän oýny çakyňdan beter,
Ol oýny görenler alar elheder.
Abraýdan düşürer, wejera eder,
Edimine-gylymyna ynanma.

Ýasamadyr, boljak bolşy alçakdan,
Bet niýetdir, päli ýamandyr çakdan.
Jaý salmakçy bolsaň toýun palçykdan,
Şor topurdyr, oň gumuna ynanma.

Kimem bolsa diýdirer beýle adam:
Kän gowudyr ondan keseki, ýadam.
Geçmekçi bolaýsaň eger derýadan,
Deşip berer, tulumyna ynanma.

Nebse gul bolana giň dünýä dardyr,
Şatlyk ýatdyr, mydam alada ýardyr.
Eý, hannas, her zadyň hasaby bardyr,
Ömür geçer, salymyna ynanma!

Aprel, 2020 ý.