Aprel

APREL

Buýr-bulaşyk bolup galdy arzuwlam,
Agdar-düňder edip gitdi dünýämi.
Aprel meniň bar zadymy äkitdi.
Orta ýaşda bolup galdym güň ýaly.
Ondan öňem durmuş däldi gül ýaly.

Ruhum ýadap, aýagyma çolaşdy,
Ykbalymyň barýan ugrun ýitirdim.
Gabrystan deý ýürekgysgynç ömrümiň
Her gününi gussa bilen ötürdüm.
Deň ýaryny göz ýaş bilen bitirdim.

Göreşmekden ýadap bir gün ýan berdi,
Müň ezýetden halas bolup geçen jan.
Dileglerniň kabuldugna ynanyp,
Şükürine çukur tapdy ejemjan.
Indi ýüregimden sowulmaz heýjan.

Menem aglap ýörmän aýdym aýdardym,
Täleý özenimden ýolmadyk bolsa.
Käbäm entek-entek ýaşar ýörerdi,
Aprel kalendarda bolmadyk bolsa.
Bolmadyk bolsa.

01.04.20 ý.

Ýazmyrat ÇÖRLI.