Ertir bahar geler...

ERTIR BAHAR GELER...

Gyş gitmez, gelmezden bahar,
Şeýle tebigatyň şerti.
Süňňüm ýylamaz bu mahal,
Haýp, ol ertir ýylar, ertir.

Hawa, howalaram maýlar,
Emma entek az-owlak ir.
Ertir kalba mähir dolar,
Ertir togsan dolar, ertir.

Gowy — ertäň barlygam bir,
Günler çogly güneş getir.
Meni doňýürek ýar, meger
Ertir ýada salar, ertir.

Men indi uzak üşemen,
Gyş öz möwritini bitir.
Görüň, hiç ruhdan düşemok,
Ýüzüm ertir güler, ertir.

Ýazy besleýän göwnümde,
Umytlam wysala ýetir.
Şu günümden nägile däl,
Mundan hem gowy bolar ertir.

Annamuhammet KIRŞENOW.