Sygan aýaly

SYGAN AÝALY

Saňa näme bolýar, sygan gelneje,
Bu gün näme täleýime garaňok?
Kelebi çolaşyp, çöken ykbalyň
Pal atmaga, aýt, nämesi ýaranok?

Ýaýrat kartlaryňy öňküler ýaly,
Hikmetli sözlerem gaýtalasana?!
Kömek etjek ýog-a özüňden başga
Meň ýaly şormaňlaý, bagtyýatana.

Ýat boldular, aýlananok şu çakda,
Gowzatmaga ýürekleriň pyganyn,
Şu jelagaýlarda, şu ütüllükde
Sen meniň tanaýan ýalňyz syganym.

Öňler seň ýanyňa gamgyn gelsemem,
Gidenimde, ganat kakyp giderdim.
Boş bolsa-da, hoş sözlerňe mätäçkäm,
Bu gün paýlaşmakçy dälmi sen derdim?!

Täleýimi ýaňzytmaga gorkýamyň,
Saňa näme bolýar, sygan gelnejem?
Garamaňlaý müşderiňi bagyşla,
Bagyşla sen pal atanňa degmesem!..

Myrat GURBANOW.