Başa bela dilden geler

BAŞA BELA DILDEN GELER / tymsal   

Bir howludaky ýatakda goýun bilen geçi ýaşapdyr. Bu arryk galan dowarlary hojaýyn sürüden getiripdir. Wagtly-wagtynda iými ýetirilen goýun we geçi tizden özüni tutupdyrlar.        
Ynha, günleriň birinde geçi goýna bakyp:
- Bahar geldi. Sähramyz gülzarlyga bürendi. Gel, şepe, indi biz hem  giň meýdana çykaly, ter otlardan çürtüp iýeli. Hojaýynyň ýok wagtyny peýläp gaçaly, erkin ýaşaly. Eýämiziň berjek ot-suwuna elgarama bolup oturmaly  -  diýipdir.          
Bu teklibe goýnuň tasdan jigeri ýarylan eken. Ol:
- Aýdýanyň näme, dogan, päliňi ýagşa tut, toba et.  Bu  matlabyňy eýämiz duýaýsa, onda dat günümize! Janyňa haýpyň gelsin! – diýipdir. Howa, mesligi göterýän goýun janawer şunuň dek töwella edip, dagy-duwara  beýle teklip bilen özüne ýüzlenmezligi geçä berk tabşyrypdyr. Ýöne geçi welin pälinden gaýdarly dälmiş. Günde-günaşa ýaňky gürrüňi öwran-öwran gozgap,  goýny gününe goýmandyr.        
Ynha, günleriň birinde geçiniň bu pygly mallaryň eýesine mälim bolupdyr. Dowarlary bu gün-erte ýazlaga ibermekçi bolup ýören hojaýyn meýlini üýtgedip, bu gaçak mallardan dynmagy müwessa bilipdir. Ol ilki bilen geçini soýup iýipdir-de, derisinden meşik taýýarladypdyr. Soň gezek goýna hem gezek ýetipdir. Onuň derisinden hojaýyn özüne toýda geýmäge gaba telpek tikdiripdir.
Hawa, bihepbäniň iki barmak ýaňra dili günälini-de ýakýar, bigünäni-de...

Şahymerdan SARYOGLY.