Oturan gelin

OTURAN GELIN

Şygyrýetiñ sözbaşynda otyrsyñ,
Tamdyra sygynyp oturan gelin.
Ýaşaýyşyñ gözbaşynda otyrsyñ,
Tamdyra sygynyp oturan gelin.

Gözden uçdy arzylanym, adanym,
Küýsemişem sen deý ýaryñ didaryn.
Röwşeni bol, nury bol sen didämiñ,
Tamdyra sygynyp oturan gelin.

Agyr ýük astynda goýup gerdeni,
Durmuş saña eçildimi gerdini.
Men daşyndan duýup durun derdiñi,
Tamdyra sygynyp oturan gelin.

Berse şatlyk-gussa deñeçerligin,
Göwün solmaz, ýitirmez öz terligin 
Ak bulut ýatladar bäbek arlygyn,
Tamdyra sygynyp oturan gelin.

Alnyña sylmaly säher bar sende,
Ömür sowulmajak bahar bar sende.
Tamdyrdanam gyzgyn mähir bar sende,
Tamdyra sygynyp oturan gelin.

Aşyr BERDIÝEW.