BETKÄRLER
Bes biliñ, bu dem ganymatdyr bize, eý ýarlar,
Bamuhapbet bolgaly, şirin suhan güftarlar,
Bilbili eýlär höwes her dem güli-gülzarlar,
Hajaty bilbil imes gül degresinde harlar,
Niku-bet neýdir, ne bilsin biakyl betkärler.
Sebze gül gadryn baharu, bahr gadryn ber biler,
Harsydünýä gadryny serkeşte söwdager biler,
Lagly-ýakutu, Ýemen daşyn bahaýy-zer biler,
Her kişi kän istese, ol gymmaty-göwher biler,
Nuku-bet neýdir, ne bileni biakyl betkärler.
Açylan elwan çeçek deşt üzre bilbil gadryny,
Ne biler zagy-beýabanlar gyzyl üzre gadryny,
Dag era käklik biler serçeşme, sünbül gadryny,
Kim seniñ gadryñny bilse, sen anyñ bil gadryny,
Nuku-bet neýdir, ne bileni biakyl betkärler.
Ýagşylarnyñ söhbetin söý, özge rahat isteme,
Biakyllar bezmide aýşy-aşrat isteme,
Yzzatu-hormat tamag eýläp, halawat isteme,
Her tagamy binemek bolsa letapet isteme,
Nuku-bet neýdir, ne bileni biakyl betkärler.
Her kişi kim bende Şeýdaýyga bolsa dertment,
Kylmasyn hergiz ýamanga "ýagşy bol" diýp, ýagny pent,
Biakyllar ähli akyllarny kylmazlar pisent,
Kim atar zowkyn olup, has üzre hynzyrga kement,
Nuku-bet neýdir, ne bileni biakyl betkärler.
Şeýdaýy.
|
