"Gök asman gijäni ýapynja edip..."

"GÖK ASMAN GIJÄNI ÝAPYNJA EDIP..."

Meniň göwnüm Aýa bakar,
Aý bakar asmana garşy.
Kemine

Gök Asman gijäni ýapynja edip
Zeminiň üstüne ýapyp goýberdi.
Şol gün Aý nurunyň ujyndan kertip
Penjirämden şöhlesini iberdi.

Gözüm gamaşdyrdy ýyly ýylpyldy,
Kölegämi saýlap berdi garadan.
Ýyldyzlar ýylgyrdy, bulut irkildi,
Men bu dünýä geňlik bilen garadym.

Salymam geçmedi, bir mymyk şemal
Sypap geçdi tutularyň ýüzüni.
Asmana seretsem nurly Aýjemal
Maňa tarap gyrpyp durdy gözüni.

Şol agşam men Aýa aşyk bolupdym,
Hatda almak üçin çümdüm hyýala.
Ýürege daýanyp elim uzatdym,
Ýetmedim, oň bolsa göwni birýana
Maňa tarap bakyp durdy daňa çen,
Soň düşündim, ol Asmanyň aşygy.
Degişýän-le, aýdanlarym oýly çyn,
Özüňize kybap saýlaň Aşygy.

Ýetmejek ýeriňe uzatma goly,
Asmandaky Aýlar seni ýatlamaz.
Penjiräňden düşüp biler Aý nury,
Ýöne özi bosagaňdan ätlemez.

• Asmanyň melegine

Höküm edip päk duýgyny gazaba,
Maňa seni söýmezligi öwretme.
Buzdan dörän şagyzy deý hazana
Öwrüp meni, söýmezligi öwretme.

Sen islediň, asman göz ýaş döküp dur,
Bägüller üşäpdir, kibtin gysyp dur,
Seret, umytlara gussa çöküpdir,
Maňa seni söýmezligi öwretme.

Bir gulpy bir açar açsa oňat bor,
Söýgi-de bir kalba ugryn gabatlar,
Ynam bolsa hökmän däl-ä subutlar,
Ynam besdir, söýmezligi öwretme.

Näm azaryň kowup meni kalbyňdan,
Ýolum sowýaň, çykarmandyň alnyňdan,
Bir özümi goýup gidip salgymda,
Gaýyp bolduň, söýmezligem öwretmän.

Bir gün ýolum düşdi size azaşyp,
Gidipsiň, Asmany bezän ekeniň.
Kalendaryň gutarmagyna garaşyp
Sen meni özüňe dözmän ekeniň.

• Düýş

Goja dünýäň gujagynda ýaşaýan,
Lälijek, kejirje bir gyz dost men.
Ol ýylgyryp gözlerime seretse,
Ýygrylypjyk durmagymdan halas men.

Dogry, tolgunýananam ýanymda dursa,
Aljyraýan, sepläp bilmän sözlerim.
Jaň almasa, sms hem ýazmasa,
Gaýgynyň üstüne ätlän gözlerim
Çirim etmän, gijeleri gündiz deý
Dik oturyp öz-özüme dözsemem,
Düşeginde uklap galan melek deý
Düýşe çümen şol perişdä dözmenem.

Ol gysylsa alan howam kemeler,
Ol gysynsa göwnüm döwük aýna deý
Pytrap gider, şowsuz günüm käneler,
Ýüregim gyýylar dilik aýa deý.

Bir gün dostlugymyzyň serhedin pozup
Umyda söýenip alnynda dursam.
Bir uly güýç bilen “Men saňa Aşyk”
diýip oňa sorag bilen ýylgyrsam,
Emma ol gülmese.
Şol bada tisginip oýanyp gitsem,
Ol gyz maňa “Näm boldy” diýp ýüzlense.

Guwanç BALLYÝEW.