Aýlansam

AÝLANSAM

Ýyldyz sanaş, sanaş maňa ezizim,
Seniň sanan ýyldyzlaňdan aýlansam!
Dodagyňdan ballar sorup üzülsem,
Seniň şirin dilleriňden aýlansam!

Saçlaryň küýsedim bilim daňmaga,
Gözleriň küýsedim öpüp-ýanmaga,
Gaşlaryň küýsedim sypap-sönmäge,
Seniň şirin ballaryňdan aýlansam!

Göwnüňdäki gülleriňe gonsadym,
Göwsüňdäki garlaryňa çümsedim,
Näzli ýarym lebleriňe suwsadym,
Seniň ajap günleriňden aýlansam!

Jahyl göwnüm Gyrat bolup oýnaýar,
Ýürek oduň öz erkime goýmaýar,
Damarda gan gaýnaýar, ýar, gaýnaýar,
Seniň bägül-gülleriňden aýlansam!

Bäşim aýdar ýandym seniň yşkyňdan,
Haçan orun bolar Köňül köşgüňden,
Suratyň çekýärin doýman keşbiňden,
Seniň ajap hallaryňdan aýlansam!

Bäşim GUTLYMYRADOW.