Nirede?

NIREDE?

Durandyr ojagym, ojaryň sönmän,
Ýakmasa gowudyr ýamany önmän.
Gidiberme bormy ogluny görmän,
Dowamyň göterjek o han nirede?

Berilmedik bagt giçläp gelermi,
Çöküp barýan göwräň gözlegi ýermi.
Güzeran keşigin zene berermi,
Ojaga baş bolan soltan nirede?

Günler geçdi, ne sebäpdir eglediň,
Gerden ejiz, ýüküm agyr, derledim.
Meýdanyňda başy silkip gezmedim,
Gül-gunçaly bagy-bossan nirede?

Sowrup alyp gitdi bu däli siller,
Bag gurady, gör, nirede bilbiller.
Diňdirip bildimi agyňy iller,
Arka direg, ýakyn hossar nirede?

Hanjar çümdi, çümdi ýürek-bagyra,
Goýmady gyz galkynara, galara...
Mahal ýokmy menziliňi alara,
Gyssanyp ýörüp sen, messan nirede?

Arman bolar baldagyňdan ir tänseň,
Göribi ýeterlik, gözlerne känsiň.
Ýeteniň awlajak jereni dälsiň,
Göwnüň islän Arap Reýhan nirede?

Zeýrenme, ýetmesin her ýere dadyň,
Hamyryna ýugrulandyr perýadyň.
Aýdanyňdan kändir aýtmaly zadyň,
Kyssasy soňlanmaz dessan nirede?

Bu ýerlerden gitmelisiň iň kyny,
Alyp bilmän gelinendir bakyny.
Gözel ile ýaýar göwnündäkini,
Syry aýry däldir, pynhan nirede?

Gözel ŞAGULYÝEWA,
Türkmenistanyñ Gahrymany.