Rubagylar

RUBAGYLAR

Eşdenňe, görenňe pikir ýöret sen,
Il-gün üçin gowulyklar döret sen.
Tertip bar ýerinde owadanlyk bar,
Arçalaryň şahalarna seret sen.

* * *

Ýaz geldi, oň täze halysyn görüň,
Oňa ganat açyp göterler seriň.
Çeşme-çaýlar akýar sährama tarap,
Daga ýagan ýagyş rysgaly ýeriň.

* * *

Bu durmuşda aňy durmaly durlap,
Kä belende, käte uçmaly ýerläp.
Toprak seniň maksadyňa düşüner,
Haçan onda zähmet çekeňde derläp.

* * *

Ylham, maňa daglaryňdan güzer ber,
Nur saçylýan ýüzleriňden nazar ber.
Görünýän zatlary biljek bolaryn,
Görünmeýän zatlar hakda habar ber.

* * *

Poeziýa meýdany, bu gözel meýdan,
Duýgular ganatly pikirden-oýdan.
Zyýan-peýdaň arasynda pikirim,
Ters pikir zyýanam, dürs pikir peýdam.

* * *

Inere ýük, ýöremäge ýol gerek,
Deňze çyksaň gämi, gurat sal gerek.
Ýol harjy, azygam gerekdir welin,
Esasy zat ýagşy niýet-päl gerek.

* * *

Daga barar gözellige teşneler,
Gujagynda seýran edip, düşlener.
Öz ýoluňy tapsaň ýagşy durmuşda,
Öz ýoluny özi tapýar çeşmeler.

* * *

Ýanyňa guş gonsun, ürkmesin senden,
Onuň ynamna gir, gorkmasyn senden.
Ynama girene bagt ýarandyr,
Ol orun alýandyr näzik göwünden.

* * *

Bahar! Sende gözelligiň saýasy,
Mähriňden gül açdy türkmen ýaýlasy.
Sen dünýäni dünýä edýän gudratsyň,
Sende rysgal, bagtyň hamyrmaýasy.

* * *

Dag beýikdir onda gar eremese,
Melhem tapylmazdy dert döremese.
Ýagşy-ýaman şerte görä döreýär,
Garynjalar üýşmez şert döremese.

* * *

Her bir gygyranyň ýakymly heň däl,
Her kimde düşünje, aň-paýhas deň däl.
Eşekler ýükçi diýip, gatyry öwdi,
Bu bolýan ahwalat inere geň däl.

* * *

Ýol sowular käte saga, kä çepe,
Gitseň oňa belet bolmaly, şepe!
Diňe ol däl, ynanmaly geçjegňe,
Öňüňde durandyr daglardyr depe.

* * *

Aýdylmasyz zat bar, aýtmaly zat bar,
Bize baha berjek ýakyn bar, ýat bar.
Gör, bu durmuş ýalňyşlykdan halas däl,
Ödelmeýän at bar, ödelýän at bar.

* * *

Her kim beýik daglaryna buýsanar,
Oň üstüne çyksam diýip küýseler.
Daglar taýyn hemişelik galmaga,
Ýeldir ýagmyr öňki durkun goýsalar.

* * *

Odun başga, şoňa görä köz başga,
Bu sährada her ýyl gelýän ýaz başga.
Çeşme joşsa köpleň çeker ünsüni,
Ýüregiňden joşup çykýan söz başga.

* * *

Ýaşaýyşda gerek her dürli zadam,
Bolşuňa syn eder ýakynam-ýadam.
Sebäp bolar iliň-günüň aýtmagna,
Özüniň ýalňyşyn bilmeýän adam.

* * *

Her kimiň arzuwy gitmeklik öňe,
Ýetmeli maksada, ol gözel daňa.
Ýöne öňe gitmek üçin iň ilki,
Pikir ummanynda çümmeli çuňa.

* * *

Wagtlaýyn bolýar kömek diýen zat,
Öz ýüküňi götermegem abraý-at.
Bilseň, guşlar götermäge agramyn,
Ganatyn giň açyp, oňa berýär bat.

* * *

Sähel zatda zeýrenmäliň pelege,
Bu, elbetde, endik akly kelege.
Rysgal eçilmeýär zähmet çekmeseň,
Içmäge hem suw guýmaly çelege.

* * *

Güllere ýel gerek ysyn ýaýmaga,
Zehin gerek hoş sözüňi diýmäge.
Söýgä-de gerekli esasy zat bar,
Päklik bilen mertlik gerek söýmäge.

* * *

Bu durmuşda işlilerden işli bar,
Hemem onda güýçlülerden güýçli bar.
Geňeşmän iş etme akyllysyrap,
Belki, sendenem has akyl-huşly bar.

* * *

Eşidipdim dagda peleň bar diýip,
Ter gülli ajaýyp öleň bar diýip.
Yşk dagynda yşkdan dert tapynsa-da,
Eşidemok ondan ölen bar diýip.

Meret BAKYÝEW.