Kalbymyň owazy

KALBYMYÑ OWAZY

Ser sämedi, dünýäm geldi lerzana,
Ýar kamaty ygtyýarym alanda.
Ýürekleriň tary bir jübüt bolup,
Heniz diňlenmedik mukam çalanda,
Galdym bir görgä.

Aýňalmaklyk iş boldy-la heserden,
Söýgä erkin berdi baş bermez durkum.
Bu takdyryň edýän täsin oýnuny,
Bilmedik bolup ýör, bilse-de her kim.
Geldik biz bergä.

Özüň bilýäň Allam, näme etjegiň!
Näme berseň gaşym çytman alaryn.
Goldow berýär maňa her bir pursatda,
Gudrata eýleýip beren galamyň,
Bereňok hemmä...

Käte-käte serler sämäp örteýär,
Arzuwlary alys ýollar getirmiş.
Gyssasa-da, gynasa-da bir daýym,
Ahyrynda ajap bagta ýetirmiş,
Öwrüp telbä.

Islänimçe işler etsem ajaýyp,
Zähmetimi ýyllaň goýnunda ýaşat!
Ýalňyz Allam, senden ýeke haýyşym:
Baýlygy göremde durkumy gagşat,
Gul etme teňňä!

Ber maňa pursaty, aýdym ýazaýyn,
Timarlap-timarlap kalba nagş etjek.
Gazananmy, ähli dünýe malymy,
Hany-manym höwes bilen bagş etjek,
Galam gaş selbä.

Kynçylyklar taplar eken durmuşda,
Sarsmaz ynam gerek eken her göwne.
Boýuntyryk salyp, daňyp nebisi,
Geregimi gözläp taparyn,
ýöne
Rysgymy kemme!

Azymberdi Kakaýew