Goç urşy

GOÇ URŞY

Gara goçlar gazap donun geýipdir,
(Janyňdan irmeseň barma golundan).
Jygar şahly gara başlar ýarylar,
Alys olar dünýäň mekir-alyndan.

Dag dek sowal dur ortada keserip,
Ýa geziber gulaklaryň salla-da.
(Gara garnyň gözemäge çöp gyt däl.
Eçilipdir bu ýyl kadyr Alla-da).

Owsunyp dur «dilber» maňyň höwesi
Aznawur ajalyň halkalarynda.
– Ýa Biribar, bir pursatlyk medet ber,
Ýa öleýin, ýa bir ýalkanaýyn-la!

«Geçiň» darkaşyndan bizar bolana
Bir sered-ä, dünýe maly sapaklar.
Mertligiň gözünde ýyldyrym çakýar.
Tütäň duruň namart, döşi gapaklar…

Muhammetöwez ARRYKOW.