Dostuma

DOSTUMA

Men Señ nyrhyñ geçmiş bilen ölçämok,
Şu pursat ýaşaýañ — şo maña besdir.
Men Señ nyrhyñ etmiş bilen ölçämok,
Belki-de pursatlañ täleýi tersdir.

Men Señ nyrhyñ gussañ bilen ölçämok,
Uwlaman urunýañ — şo maña ýetik.
Men Señ nyrhyñ nusgañ bilen ölçämok,
Örtenişiñ bilen ölümden ötüp.

Men Señ nyrhyñ Älem bilen ölçämok,
Dünýä eñräp durka, kalbyña sygman,
Men Señ nyrhyñ päliñ bilen ölçämok,
Pyganyñ päkligim edýärkä yglan.

Men Señ nyrhyñ didäñ bilen ölçämok,
Owalaryñ dolman durka manydan,
Men Señ nyrhyñ bijäm bilen ölçämok —
Bagty çüwüp, paýyn alan Panydan.

Men Señ nyrhyñ nalañ bilen ölçämok,
Gülkiñ joş urýarka agydan ýeñlip,
Men Señ nyrhyñ dawañ bilen ölçämok,
Aýylganç duýgudan gözläñde deñlik.

...Men Señ nyrhyñ ömrüm bilen ölçämok,
Mensiz ýaşap biljegiñe ynanýan.
Men Señ nyrhyñ ölmüm bilen ölçämok,
Gatnarsyñ sen, ölendigme ynanman...

Bapba GÖKLEÑ.