ÖÝKELEME SEN
Ahyr bir gün sabyr käsäm pürlener,
Onsoñ beýle ýumşak gelni tapmarsyñ.
Ýüregime ýyllar beren azaryň,
Barynyň aryny birden alaryn.
Ýumruk salman, sögünç alman dilime,
Gargyşam okaman duşan günüme,
Aldaw-hilä ýüz urjagam bolmaryn,
Muňa ýolam bermez zenan mertebäm.
Özüň deý biwepa bolubam bilmen,
Kazym bardyr alaja deý garakda.
Seniň ýykdym hasap eden dünýäňi,
Ýykman saklap ýörün ýyly gursakda.
Ynsabym - Hudaýym mähriban oglum,
Kalba giňlik berip yaşadyp gelýär.
Göz ýaş, gan dökmerin ýekeje damja,
Oguljygym bagra basyp bir demde,
Giderin dünyäňe gelmedik ýaly,
Seni jandan geçip söýmedik ýaly,
Ýaşaber, ýaýnaber mensiz dünyäňde,
Tans et, aýdym goyup uly ses bilen,
Şatlan gaýdanyma ýüregiň böküp,
Buşlap çyk eliňe suýjülik alyp,
Ynjyk göwni ynjydanňa begenip.
Nädeýin, gursagňa guýup bilmesem,
Maşgala bolmagyň bagtdygyny.
Toý-meýlisde, şüweleňde ýaşasaň,
Bilýämikäň agyň näme zatdygyny?
Gaýdanyma begenensiň ýürekden,
Belki dost-ýarlaňam ýygnarsyň agşam...
Menden göwnüň galyp öýkeleme sen,
Öz ogluñ toýuna çagyrylmasaň...
Bagtygül TEKÄÝEWA.
|
0
