Döredijilik ummanynyñ bosagasynda

Döredijilik ummanynyñ bosagasynda

▶ ÝOLLAR SAŇA, ROWAÇ BOLSUN, ATANYÝAZ

Şahyranalyk hem edil merdanalyk ýaly, halkymyzyň milli häsiýetleriniň biridir. Bu taryhy hakykat artykmaç subutnamalara mätäç däl. Şahyranalygyň milli häsiýetligi dogrusynda bäş müň ýyldanam gowrak menzili arka atan halkymyzyň islendik döwrüne ýüzlenseňem, mysal ýeterlik. Şahyranalygy halkymyz aýratyn ähmiýetli mertebe hasaplapdyr. Dünýäniň goýnunda ýetmişden gowrak döwleti esaslandyran halkymyzyň begleri, han, soltanlary şygyr sungatyna aýratyn sarpa goýupdyr. Olaryň köpüsiniň özi ady belli şahyrlardyr. Soltan Sanjaryň, Muhammetguly Kutb şanyň, Jahanşanyň, hanlar hany Baýramhanyň şahyrana döredijilige goýan sarpasyny taryh öz hakydasyndan hiç haçan öçürmez.
Türkmen zenanlarynyň mähir-muhabbeti hüwdi bolup, perzentleriniň süňňüne siňip- dir. Ýeri, onsoň, türkmen halkynyň şahyranalygyna milli häsiýet diýmän, näme diýersiň?!
Şonuň üçin hem goşgy düzmäge höwes etmedik türkmen az-azdyr. Şonuň üçin hem olaryň öz isleglerini yzygiderli dowam etdirenleri-hä şahyrlyk kesbinden daşda bolmandyr. Durmuşyň başga hünär-kärlerine göwnüni berenlerem gowy okyjy ýa gowy diňleýji bolmagy başarypdyr.
Soňky ýyllarda ýurdumyzyň metbugat sahypalaryna ser salsaň, şygryýet bossanyna gadam goýan ýaşlaryň sanynyň barha köpelýändigine göz ýetirýärsiň. Bu örän buýsançly maglumat. Çünki ýurdumyzda edebiýata, edebi döredijilige aýratyn sarpa goýulýar. Hormatly Prezidentimiz Gurbanguly Berdimuhamedow hem egsizlmez ylham çeşmesiniň eýesi, onuň nusgalyk döredijiligi bolsa ylham güzerine gelýän ýaşlaryň sanynyň barha artmagyna özboluşly badalgadyr.
Türkmen döwlet medeniýet institutynyň talyby Atanyýaz Hangeldiýewiň hem ady indi ençeme wagt bäri metbugat sahypalaryny yzygiderli okaýan okyjylara tanyşdyr. Onuň goşgulary özboluşly akgynlylygy bilen tapawutlanýar. Atanyýazyň metbugat sahypalarynda taýýarlaýan rowaýatdyr tymsallary hem milli häsiýetlerimizi dabaralandyrmakdan ugur alýar. Türkmen halkynyň asyrdan-asyra, nesilden-nesle geçirip gelýän milli häsiýetlerine tutuş durky-düýrmegi bilen ysnyşan ýigidiň goşgularynda-da şol ýakymy duýup bolýar.
Atanyýazyň şygryýetiň bossanyna täzeçe öwüşgin çaýjak çemenzarlygy emele getirjekdigine bil baglasa bolar. Onuň şygyrlarynda şygryýete iň zerur bolan mahsuslyklar duýulýar. Onuň goşgulary akgynly okalýar. Duýgulary ýerbe-ýer, aýtjak bolýan pikirini duýgulara dolap, sazlaşykly goşgy setirlerini döredip bilýär. Aýratyn hem, Garaşsyzlyk, Watan berkararlygy, döwrüň bagtyýarlygy bilen bagly goşgulary şahyrana joşgunlylygy bilen tapawutlanýar.
Atanyýaza diňe öz zehininiň üstünde tutanýerli işlemek gerek. Ol ogluna niýetlenen goşgy setirlerinde: biziň aýtmak isleýän pikirlerimizi has şahyrana beýan edýär:

Özüňi açmaga ylym gerek däl,
Synla adamlary, diňle pikirin.

Atanyýaza indi diňe özüni açmak gerek. Tebigatyň ylham-zehininden Atanyýazyň paýy ýetik. Ol okamagy, del pikirleri tapmagy gowy görýär. Elbetde, islendik hünäriň kämilligine ýetmek üçin gerek bolan tutanýerlilik şygryýet bilen iş saly- şanlar üçin has-da zerur. Döredijilikdäki başarnyklary üçin hormatly Prezidentimiz tarapyndan «Türkmeniň Altyn asyry» bäsleşiginiň ýeňijisi hökmünde şa serpaýyny almagy hem onuň şygryýetdäki ädimleriniň ynamlydygyndan habar berýär.

Olaň mähri seniň alýan demiňdir,
Olaň pähmi dertleriňe emiňdir.
Öwezini dolup bolmaz kemiňdir,
Eger käbäň bilen kyblaň bolmasa.

* * *

Añ pikirler dürs çözüp dur bu durmuşyň matalyny,
Köňlüm at deý öňe çapýar söküp ýollaň kötelini, Altyn güýzüň rysgallydyr,
Zemin tylla ketenili,
Ak säherler buşlap gelýär wysallarňa ýeteniňi, Iliň abat, günleň rahat, gülleriň elwan, Watanym!
Hem Garaşsyz, hem Bitarap eziz, mähriban Watanym.

Döredijiliginden mysal alnan iki bent goşgynyň setirlerinden görnüşi ýaly galamyna ynamy ýetik, zehin-başarnygy ýetik ýigidiň ylham çeşmesinden joşup çykýan ajaýyp goşgulary bilen teşne göwünleri gandyrjakdygyna bil baglap bolar.
Döredijiligine täzeçe badalga berýän zehine bize diňe ýekeje arzuw galýar — rowaç bolsun ýollar saňa, Atanyýaz!

Aşyrmät GARLY.

* * *

"Bize giň göwün beren Biribar,
Şol göwni gülmekden binesip etme!» Berdinazar HUDAÝNAZAROW.

■ BINESIP ETME!

Aglap, dünýä gelýäs, eziz ykbalym,
Soňunda gülmekden binesip etme!
Köňül berip söýen söýgüli ýaryň,
Gujagna dolmakdan binesip etme!

Söýgüdir adamlaň kalbyny dilen,
Bilbilsiz süllerip-saralar gülem,
Deňi-duş, dost-ýarlaň, goňşulaň bilen,
Baryşyp-gelmekden binesip etme!

Güýçlüdir gussasyn bildirmän ýeňýän,
Mümkin kän bilýändir köpüräk dymýan,
Garaz, kim bolsa-da, gojaman dünýäň,
Lezzetin almakdan binesip etme!

Baş bolup halaldan guran öýüňe,
Gatnaşyp il-günüň ýas-u-toýuna,
Guwanyplar perzentleriň boýuna,
Bagtyýar bolmakdan binesip etme!

Bu durmuşda adam her dürli pälde,
Asla azaşmasyn ötegçi ýolda,
Gynanyp, syrkawlap, ejizläp däl-de,
Mertlerçe ölmekden binesip etme!

Sebäpkäri bolman hiç bir hatanyň,
Gullugynda durup eziz Watanyň,
Ömürleň bezegi ene-atanyň
Hormatyn bilmekden binesip etme!

Ömür bize berlen ötegçi owaz,
Mydam dowam eder güýz, tomus, gyş, ýaz,
Munda joşup durka şahyr Atanyýaz,
Ylhamny gelmekden binesip etme!

■ BIR GÜN

Eger-de ýaramsyz kütek daş bolsaň,
Pitiwa etmezler, deperler bir gün.
Sen gujur-gaýratly, özem ýaş bolsaň,
Üstüňe zer suwun seperler bir gün.

Ýetik heňňamlaryň şatlygam, derdem,
Ýykylsaň, az bolar göterjek ýerden,
Mukaddes bir zada öwrülseň birden,
Ýene ýüze sylyp, öperler bir gün.

Adamlar howa dek üýtgeşip dursa,
Wezipe-de, pulam, wagtlaýyn närse,
Tilki nikap geýip, dönse-de barsa,
Hilesine hile taparlar bir gün.

Diň salyp gör bu durmuşyň heňine,
Hiç kim ýetmez ene-atanyň deňine,
Öwünmegin münseň Eýfel diňine,
Sendenem ýokara çykarlar bir gün.

Gelejegi ýokdur düýni bolmasa,
Ýaşasaň, işleriň kyny bolmasa,
Kä kişide Allaň syny bolmasa,
Günäsi gözüni gapar bir gün.

■ BOLMASA ÝAGŞY

Bagyşlanýar ownuk-uşak hatalar,
Ýöne ol owalda bolmasa ýagşy.
Gürleýärkä eneler hem atalar,
Perzentler ses-üýnsüz diňlese ýagşy.

Dostlaryň gurşasa töwerek-daşy,
Mydam belent bolar göwünleň hoşy,
Näçe mert bolsa-da adamyň başy,
Bimahal dert-bela gelmese ýagşy.

Päkize ýollary agtar kalby päk,
Göwnüňiz giň bolsun, söýgi — ýeke-täk,
Käte adam özi bilen ikiçäk,
Galyp, öz-özüni derňese yagşy.

Ýygyrt az bolarmyş gülünýän ýüzde,
Ýürekler ynjalar ajaýyp sözde,
«Dil — bela, diş — gala» diýilýär bizde,
Hemmeler syryňy bilmese ýagşy.

Işi rowaç bormuş ýüregi pägiň,
Bilbili kän bolsun gunçaly bagyň,
Yşka düşüp, ýaňy dälirän çagyň,
Söýgi ýüregiňi dilmese ýagşy.

Bu durmuşda ýalňyz bolmazyň ýaly,
Kynçylyk, jepany bilmeziň ýaly,
Gül ýüzüň saralyp-solmazy ýaly,
Nowçakaň, ene-ataň ölmese ýagşy.

Uly bagt, gezseň munda şatlanyp,
Döwür bilen gadam ursaň batlanyp,
Gowy adamlaň arasynda ýatlanyp,
Kämahal gulagyň şyňlasa ýagşy.

Ýerliksiz aglamaň, biderek gülmäň,
Esasy haýyşym: ýasama bolmaň,
Indi mundan artyk wagtyňyz alman,
Şahyram sözüni soňlasa ýagşy.

■ DURMUŞA SER SALYP

Ýalňyşlygyň ýüze diýenden däl-de,
Ony, ýokkaň, ile ýetirýänden gork.
Haýbatyňy haýbat bilen gaýtarman,
Dişin gysyp, dymyp oturýandan gork.

Sowulmanka juwanlygyň sapasy,
Aljyratmaz ýollaň sütem-jepasy,
Ynamly däl kän aşygyň wepasy,
Sözlerini bala batyrýandan gork.

Her kim eneň däldir derdiň çekere,
Durmuş oýun däldir, oýnap-bökere,
Hiç haçan gyssanma içiň dökere,
Köpçülikde ýaňrap oturýandan gork.

Sagatkaň, hiç zadyň ýetmeýän ýaly,
Dertlä zerur däldir dünýäniň maly,
Kändir bu durmuşyň pirimi, aly,
Derejäňden beýge göterýänden gork.

Adam kämil däldir, çig süýt emendir,
Bir göwrede ýagşy hem-de ýamandyr,
Hakykat bir haltadaky temendir,
Ýalan sözläp, günün ötürýänden gork.

# garagum_2019