Gyjyt berdiñ diýilse has dogry bolardy, gyjynmak başga zat.
- Şygyr çyrşalmaýar. Şygyr bagryñdan, añyñdan, ýüregiñden syzylyp, elenip kagyza dökülýär, şygyr ýazylýar.
Şygyr - şahyryñ perzendidir. Perzent bolsa çyrşalyp ýasalmaýar. Şygyryñ gowy ýa-da gowşak bolup çykmagy, ol eýýäm başga gürrüñ. Çünki perzent diýlende-de, hemme perzent on iki süññi sag bolup bilenok ahyry. Çaga dogabitdi ýa-da soñra bie saý-sebäp bilen maýyp boldy diýibem (ylahym bu hiç kimiñ başyna gelmesin!) çagañdan ýüz öwrüp bilmeýäñ. Şoñ üçin gowşagam bolsa, kämilem bolsa (jalataýlyk edýän ýigitler ýeñles gylykly zenana baranda, "içgilikäm birmahal çyrşap gaýdypdym, galman geçen şonda göwresinde galaýypdyr" diýse dogry manysyny berer "çyrşamak" sözi, emma nikaly aýalyñdan bolan halal çagañ "çyrşalyp" ýasalmaýar) şygyram biziñ öz perzendimiz (dogry ýañky jalataý ýigitleñ edähedine eýerip, ondan-mundan gyrp-çyrp edip on goşgydan bir "boşgy" ýasaýanlar "çyrşadym" diýse, şolañky bir hasap, şonda bu söz dogry manysyny berer) Hiç bir ene-ata bolsa halal çagasyna degişmä salybam "haçanky çyrşan zadyñ" diýseñ halamaz. Şoñ üçinem awtoryñ goşgusynyñ hiline garamazdan "men ýazdym, meniñki şu şygyr" diýip elini galdyrjak goşgusyna "çyrşadym" sözüni hiç gelişdirip bilmedim.
- Hem goşguçylygy kär hasaplap, her kesiñ bir käre gol bermegini "dynçja uklamak" hasaplasak, naýynsaplyk etdigimiz bolardy. Hem hemmeleriñ şahyr bolmak diýen ýaly aladasy ýok (jahanda başga alada gytmy), hem biziñ iki oýnam goşgymyzy okamaga wagtlary barmy adamlañ, ýeri onsoñ nädip olar "dynçja uklaýarka"?
- Pikiriñ ýüwürýän ýeri kalp däl, başga ýer.
- "Otdeý çagalañ"? Düşünmedim.
- Awtor "ozdum" diýýär. Kimden?
A ondan öñki bentde bolsa deñ-duşlaryny mal bakyp ýören çopandyr padyman edip goýýar? Awtoryñ hemme obadaşlarynyñ goşgy ýazmagynyñ mümkin bolmaýşy ýaly, olañ hemmesi mal bakýan däldir-ä? Diñe aýlawda bir çapuwa girenleñ biri ozýar, ýa biri yza galýar. A awtoryñ ýoly bolsa, olañkydan aýry. Ýagny, diýjek bolýanym padymanlykda ozdurmandyr. Eger ozanam bolsa (olam öz pikiriñçe) goşguçylykda ozdurypdyr.
Çopançylygy yzagalak bir kär ýaly görmek ýalñyş pikir. Pygamberleriñ aglabasynyñ ilki çopan bolandygyny, çopançylykdan döwlet tapandygyny ýatdan çykarmazlyk gerek. Dogry soñky bendiñde "halaldan ekleýärem" diýipsiñem ýogsa. Emma goşgynyñ süññûni dûzýän, aýtjak bolýan zady welin, gönüden-göni muña garşy gelýär. Hem haçandan bäri çopandyr padymanlary özüne "garşydaş" belläp ýörkä?
Her bentdäki aýdylýan pikir beýleki bentdäki pikire sepleşmeýär. Many taýdanam, pikir taýdanam dagynyk.
- Hem şahyrlygy il-günden ozdurmak diýip düşünýän bolsa bilmedim-dä. Gaýtam özünde şahyr üşügi bar hasaplaýan adam iliñ-günüñ arasyna garylyp-gatylmaly dälmi? Özüñi iliñ çagasyndan, ilden bir ädim öñde hasaplamak - ilden, hakyky okyjydan üzñeleşmek dälmi?
- "Şan aşmak"? Birinjiden-ä sözlemiñ dûzülişi ýalñyş. Näme diýiljek bolýanyna düşündim düşünmesine. Ýöne munda az-owlak hwastunlygyñ (öz-özüñe baha bermegiñ) ysy bar. Hem beýle diýmäge näme esas tapyndyka awtor? Hem bardy-geldi arzuwlaýan şöhrat-şany dag-dereleri aşaýýanam bolsa, onda bärde "ejiz hally" kim? "Ejiz hally" biri öñe ylgap bilermi? Onsoñ nädip "ejiz hallylaryñ" şany aşýaka? Goşgynyn başynda awtor ejesiniñ ejiz ýüregini bekedenini aýdýar, iñ soñky bentde bolsa ýene ejiz halyna dolanyp gelýär, şol ikiaralykda ol nirede öñe ylgapdyr, nirede şany aşypdyr. Belli däl. Goşgy-da muña kanagatlandyryjy jogap ýok.
- Iñ soñky bendiñ iñ sonky setirinde illeñ çagasyny goşa dyrnaga alypsyñ. Munda ironiýa barmy ýa illeñ çagasyna göwnüýetmezçilik barmy? Düşünmedim?
