Şükür bagşy

ŞÜKÜR BAGŞY

Şükür bagşy gaýdyp gelýär ilerden,
Gaýdyp gelýär jeňi saz bilen ýeňip.
Käte pese inip, käte alaňda
Görnüp,
gelýär başyn eýere egip.

Soňam atdan düşdi.
Goýberdi aty
Türkmen sährasynyň bir ýan çetinden.
Şükür daňyň ýaňy saz beren wagty,
Süri ören wagty sagy-çepinden.

Gümmürdedip, gümmürdedip dutary
Çaldy,
otlaman diň saldy ýorgasam.
Gözlerinden uçan eken bu taýy,
Ýaňydy ahyry gideni ýogsam.

Ähli zat öňkilik. Ähli zat täze,
Ýazylyp-ýaýrady iline gelip.
Goşa kirşe dil bititp dur, bu käre
Baş goşup, görmändi beýle saz çalyp.

Neneň ýyly dogduk diýaryň demi,
Hem şeýle bir ajap, şeýle bir seleň!
Diňe agaňy däl, ähli gideni
Bu ýere getirseň, dutaryň bilen!

1985 ý.